D’Black Blues Orchestra-ն Գյումրիում հանդիսատեսի համար անակնկալ է պատրաստել (ֆոտո)

D’Black Blues Orchestra-ն Գյումրիում հանդիսատեսի համար անակնկալ է պատրաստել: Այս մասին Գյումրիում լրագրողների հետ զրույցում հայտնեց խմբի ղեկավար, «Ավրորա» բարեգործական նախաձեռնության հովանավոր Վլադիմիր Ավետիսյանը:

Նրա խոսքով՝ համերգը նախատեսվում էր դեռեւս անցյալ տարի, բայց ինչ-ինչ պատճառներով չկայացավ: «Հնարավորությունը բաց չթողեցինք, որ «Ավրորա» համաժողովի շրջանակում օրերից մեկը նվիրենք Գյումրիին: Ինձ համար սա անչափ հուզիչ է եւ պատասխանատու, որովհետեւ իմ նախապապերից մեկը հոգեւորականի իր կարիերան հենց այստեղ է սկսել: Իմ ընկերները մասնակցել են 1988 թվականին սարսափելի երկրաշարժից հետո Լենինականի վերականգնմանը: Ես առաջին անգամ եմ Գյումրիում, ինձ անչափ դուր է գալիս: Այն, ինչ այսօր տեսա՝ այդ հոյակապ հետիոտնային փողոցը»,- իր տպավորությունը հայտնեց Վլադիմիր Ավետիսյանը՝ հավելելով, որ տպավորությունը չի փչացնում անգամ ցերեկվա տաքության եւ երեկոյան ցրտի հակադրությունը. «Երեկ մենք փորձեցինք ստորագրություններ տալ, եւ բոլորը սառել էին, ինչպես Ռուսաստանում»:

Վլադիմիր Ավետիսյանը նշեց, որ Գյումրիի վերաբերյալ իր պատկերացումը տեսածից շատ չի տարբերվում. «Ես չէ՞ որ, ամեն դեպքում, կարդում եմ, համացանցում նայում: Սկզբունքորեն այսպես էլ պատկերացնում էի, ճարտարապետությունը, հին շենքերը, վարդագույն տուֆից ամբողջական թաղամասերը: Ոչ մի բան չի հիասթափեցրել: Ամեն ինչ դուր է գալիս: Բայց ես դեռ քիչ բան եմ տեսել: Բայց միշտ ավելի լավ է սեփական աչքերով տեսնել, քան լսել լավագույն պատմությունները կամ այդ մասին կարդալ լրատվամիջոցներում»:

Պապիկի մասին պատմությունը հստակեցնելու խնդրանքին Ավետիսյանը պարզաբանեց, որ ազգականը եղել է հայ կաթոլիկ եկեղեցու հոգեւորական: Սովորել է Ավստրիայում եւ իր ճանապարհն ավարտել Ղրիմում՝ լինելով Ղրիմի կաթոլիկ եկեղեցու ղեկավարը: «Առանձին պատմության կամ նույնիսկ կինոյի սյուժե է»,- նշեց Վլադիմիր Ավետիսյանը:

Ինչ վերաբերում է Գյումրիի հետ կապված ծրագրերին, ապա այդպիսիք առայժմ չկան. «Քաղաքի հետ կապված ծրագրեր առայժմ չկան: Առայժմ միայն ծանոթացել եմ: Կարծում եմ, որ վաղը Դիլիջանում մենք «Ավրորայում» կարծիքներ կփոխանակենք: Կմտածենք, թե այս հրաշալի քաղաքում ինչ եւ ինչպես կկարողանանք կյանքի կոչել»:

«Եթե խոսում ենք բիզնեսի մասին, այլ ոչ թե բարեգործության, ապա պետք է լինեն որոշակի պայմաններ, պետք է կլիմա լինի, որը ներդրումներ կգրավեր: Մարդկանց պետք է ձեռնտու լինի: Այս ուղղությամբ պետք է աշխատեն քաղաքապետարանն ու կառավարությունը: Ինձ թվում է՝ ամեն ինչ բավականին լավ ու դինամիկ է զարգանում: Համենայնդեպս, հեռվից այդպես է թվում: Հուսով եմ, որ ամեն ինչ հրաշալի կլինի»,- հավելեց Ավետիսյանը:

Պատասխանելով հեռվից Գյումրիով հետաքրքրվածության հարցին՝ Վլադիմիր Ավետիսյանը նշեց, որ Հայաստանն, «ըստ էության, հեռվից հետաքրքիր է»։ «Էլ ավելի հետաքրքիր է, երբ գալիս ես այստեղ։ Դժվար է ասել՝ Գյումրի՞ն կլինի, թե՞ Ստեփանակերտը։ Խումբը միշտ հիացած է։ Մենք բազմիցս ենք այստեղ եղել։ Իհարկե, առաջին այցելությունը եւ համերգը շատ անսովոր էին։ Գնացինք Ստեփանակերտ ձմռանը, մնացինք ճանապարհին։ Երաժիշտները հրում էին ավտոբուսը, այնպես էին ցանկանում հայտնվել Ստեփանակերտում։ Համերգից հետո նախագահ Բակո Սահակյանը հրավիրեց այստեղ գալ ամռանը, եւ մենք էլի մի քանի անգամ եկանք։ Մեր խմբի մարդիկ շատ են սիրում Հայաստանը։ Սկզբում խոսում են մշակույթի, այն մասին, որ Հայաստանն առաջինն է ընդունել քրիստոնեությունը, հետո՝ ուտելիքի։ Ինչպես են նրանց հյուրասիրո՜ւմ։ Եվ այստեղ ես հասկանում եմ, որ ես նրանց կորցնում եմ»,- կատակեց Վլադիմիր Ավետիսյանը։

Խոսելով այսօրվա համերգի մասին՝ երաժիշտը նշեց, որ խումբն այս ծրագրով հանդես է գալիս առաջին անգամ։ «Երաժիշտները հուզվում են։ Անգամ մինչ այդ կատարած կոմպոզիցիաներն այսօր այլ կերպ են հնչելու։ Հայ հանրությունը շատ երախտապարտ է, եւ մենք մի քանի անակնկալներ ենք պատրաստել։ Մենք կցանկանայինք, որպեսզի մարդիկ ոչ թե պարզապես երաժշտություն լսեն, այլ մասնակցեն համերգին։ Հատուկ մի քանի կոմպոզիցիա ենք ընտրել, որտեղ մարդիկ կարող են ձայնակցել։ Մենք միշտ ձգտում ենք այնպես անել, որ ուր որ գալիս ենք, երաժշտական փորձարկումներին ընդգրկենք տեղի երաժիշտներին։ Այս մեկը նույնպես բացառություն չէ»,- նշեց Վլադիմիր Ավետիսյանը, բայց գաղտնիքները չբացեց։