«Իհարկե, մեղավորությունը պղնձամոլիբդենային գործարանինն է». Էրիկ Գրիգորյանը՝ պոչամբարի խողովակի վթարի մասին
Հայաստանում պոչամբարների անվտանգության հետ կապված կա օրենսդրություն, ընթացակարգը սահմանված է, բայց բոլոր պոչամբարների անվտանգության առաջին պատասխանատուն տնտեսվարողն է: Այս մասին կառավարության նիստից հետո լրագրողների հետ զրույցում նշեց Շրջակա միջավայրի նախարար Էրիկ Գրիգորյանը:
Նրա խոսքով, օրենսդրությամբ, առաջին փուլում ՇՄԱԳ-ի միջոցով ուսումնասիրվում է, հետագայում ԱԻՆ-ն ունի տեխնիկական անվտանգության գործընթաց, որն ավելի ընդհանրական է:
Անդրադառնալով Զանգեզուրի պղնձամոլիբդենային կոմբինատի Արծվանիկի պոչամբարի խողովակաշարի վթարին, նա նշեց, որ այդ խողովակաշարը կառուցվել է ԽՍՀՄ վերջին տարիներին, երբ որոշվել է Զանգեզուրի պղնձամոլիբդենայինի պոչերը տասնյակ կմ-ով խողովակներով տեղափոխվում են Արծվանիկի պոչամբար:
Նախարարը նշեց, որ հանքարդյունաբերող ընկերությունները իրենց նախարարության նկատմամբ ունեն պարտավորություններ. «Մեր հանդեպ պարտավորություններ ունեն, որ աղտոտում չլինի, չափաքանակներից ավելի ջրառ չլինի: Բայց քանի որ կարգավորումները մեծ մասամբ ֆիկտիվ բնույթ են կրել, ծիծաղելի ցածր են եղել, շատ դեպքերում շահավետ է եղել տեխնիկական լուծումների չգնալ, եւ եթե լինի վթար, վճարել այդ վթարի 500-600 հազար դրամը եւ չանհանգստանալ»:
« «Զանգեզուրի պղնձամոլիբդենային կոմբինատին» պատկանող Արծվանիկի պոչամբարի խողովակաշարից արտահոսք է եղել և հոսքաջրերը լցվել են Ողջի գետը, անմիջապես պոչամբարից չի արտահոսք եղել»: հավաստիացնում է Էրիկ Գրիգորյանը:
Նրա խոսքով, Բնապահպանական եւ ընթերքի տեսխչական մարմնի աշխատակիցները փորձանմուշներ են վերցրել, Առողջապահության տեսչությունը նույնպես այնտեղ է. «Ամեն մեկն իր մասով գործը կանի: Բնապահպանական օրենսդրությունը սահմանում է պատիժների այն չափը, վնասների փոխհատուցման չափը, որը կհաշվարկեն եւ կներկայացնեն: Խողովակի անցքը փակված է, կարծում եմ՝ էլ չի հոսում: Աղտոտման ծավալները եւ վնասի աստիճանը տեսչական մարմինը պետք է իրականացնի վարույթի շրջանակներում եւ հաշվարկի գործող օրենսդրության»,-ասաց նախարարը:
Նա հավելեց, որ բնապահպանական օրենսդրությամբ ջրի աղտոտման համար վնասների փոխհատուցման շատ ծիծաղելի չափեր են նախատեսված. «Ներկայումս մենք վերանայում ենք այդ համակարգը, պատիկներով ավելացվելու է: Նախկինում էլ եղել են վթարներ, հաշվարկել են վնասը, ասենք, 500 հազար դրամ եւ դրանով փակվել է»:
Էրիկ Գրիգորյանը նշեց, որ այդ խողովակաշարը Քաջարանից տասնյակ կիլոմետրերով անցնում է մինչեւ հասնում է Արծվանիկի պոչամբար. «գուցե ընթացիկ վերանորոգումներ լինում են, բայց պարբերաբար այսպիսի վթարներ լինում են: Իհարկե, մեղավորությունը գործարանինն է»,-ասաց նա: