ՀՀ ոստիկանապետի ժամանակավոր պաշտոնակատարի հրամանները անակնկալի են բերել ճանապարհային ոստիկանության բարձրաստիճան սպաներին. Երևանն էլ ունի նոր ՃՈ պետ

SHAMSHYAN.com-ի տեղեկություններով՝ այսօր՝ հոկտեմբերի 12-ին, ՀՀ ոստիկանապետի ժամանակավոր պաշտոնակատար, ոստիկանության գնդապետ Արման Սարգսյանը մի շարք հրամաններ է ստորագրել:

Ինչպես հայտնում է ֆոտոլրագրող Գագիկ Շամշյանը, Ա. Սարգսյանի հրամանով Երևանի ճանապարհային ոստիկանության պետ Արման Հակոբյանը ազատվել է զբաղեցրած պաշտոնից և Ա. Սարգսյանի մեկ այլ հրամանով նշանակվել է ՀՀ ճանապարհային ոստիկանության պետի անձնակազմի գծով տեղակալ:

ՀՀ ոստիկանապետի պաշտոնակատարի մեկ այլ հրամանով Երևանի ճաապարհային ոստիկանության պետ է նշանակվել Վահան Էվինյանը, ով Ա. Սարգսյանի մեկ այլ հրամանով ազատվել է ճանապարհային ոստիկանության 2-րդ սպայական գումարտակի 1-ին վաշտի հրամանատարի պաշտոնից: Ա. Սարգսյանի մեկ այլ հրամանով ճանապարհային ոստիկանության 2-րդ սպայական գումարտակի հրամանատար Աշոտ Սայադյանը ազատվել է նշված պաշտոնից և ուղարկվել ոստիկանության կադրերի ռեզերվ: Ա. Սարգսյանի մեկ այլ հրամանով ճամապարհային ոստիկանության 2-րդ սպայական գումարտակի հրամանատար է նշանակվել Արսեն Մարդոյանը, ով մինչ այդ աշխատում էր նույն գումարտակի հրամանատարի տեղակալ:

ՀՀ ոստիկանապետի ժամանակավոր պաշտոնակատար Ա. Սարգսյանի մեկ այլ հրամանով Արմեն Սարգսյանը նշանակվել է Երևանի հաշվառման բննական՝ ժողովրդին հայտնի՝ ՄՌՈւ-ի պետ: Ա. Սարգսյանի մեկ այլ հրամանով Երևանի ճանապարհային ոստիկանության անձնակազմի գծով տեղակալ է նշանակվել Արթուր Բեքթաշյանը:

Ֆոտոլրագրողի տեղեկություններով՝ նշված նշանակումները անակնկալ են եղել նշանակվողների համար: Նրանք այսօր են իմացել, որ ոստիկանապետի ժամանակավոր պաշտոնակատարի հրամանով իրենք այլ տեղեր են նշանակվել:

Ֆոտոլրագրողի տեղեկություններով՝ այսօր ոստիկանության վարչական շենքում հանդիպում է նշանակված Ա. Սարգսյանի և ճանապարհային ոստիկանության ղեկավար կազմի հետ և Ա. Սարգսյանը թիվ 1 խնդիր է դրել այն, որ հասարակությունը պետք է կարճ ժամանակում զգա փոփոխության տարբերությունը ճանապարհային ոստիկանների աշխատանքում, իսկ նշված նշանակված անձինք բոլորն էլ երկար տարիներ աշխատել են ոստիկանության համակարգում և տիրապետում են իրենց գործին:

Երևանի ճանապարհային ոստիկանության նորանշանակ պետ Վահան Էվինյանն է :