«Ապստամբություն ոչնչացման դեմ» շարժման հարյուրավոր ակտիվիստներ արգելափակել են Ամստերդամի կենտրոնական փողոցներից մեկի երթևեկությունը
«Ապստամբություն ոչնչացման դեմ» շարժման հարյուրավոր ակտիվիստներ արգելափակել են Ամստերդամի կենտրոնական փողոցներից մեկի երթևեկությունը, ինչը քաղաքում լուրջ խցանումների պատճառ է դարձել, հաղորդում է ՏԱՍՍ-ը:
Նիդերլանդական հեռուստաալիքների հաղորդմամբ՝ ցուցարարները երթեւեկելի հատվածում վրաններ են տեղադրել: Ոստիկանությունը շրջափակել է թաղամասը, որտեղ ակցիա է ընթանում, որպեսզի այլ մարդիկ չկարողանան միանալ: Իրավապահ մարմինների հաղորդմամբ՝ գործողությունները նպատակ ունեն ապաշրջափակել ճանապարհներն ու վերականգնել անվտանգ երթեւեկությունը:
Ավելի վաղ Ամստերդամի քաղաքապետարանն արգելել էր փակել քաղաքի գխավոր փողոցներից մեկը, սակայն շարժումը հայտարարել է, որ չի հետեւի տեղական իշխանության ցուցումներին:
«Իշխանությունները գիտեին խնդրի մասին դեռեւս 30 տարի առաջ, սակայն ոչինչ չի արվել: Հարցերի եւ խնդրագրերի ժամանակն անցել է»,- հայտարարել է շարժումը:
Նշվում է, որ տվյալ բողոքի ակցիան միջազգային արշավի մի մասն է: Բեռլինում հազարավոր ակտիվիստներ եւս փակել են հիմնական փողոցներից մեկը, Փարիզում շրջափակել են առեւտրի կենտրոնը: Ակիցաներ են ընթանում նաեւ Սիդնեյում եւ Լոնդոնում: