Թավշյա հեղափոխությունից հետո քանիցս է գրվել, որ դժվարացել է ԵՄ անդամ երկրներում Հայաստանի քաղաքացիների կողմից ապաստան ստանալը, հայցերն ավելի շատ են մերժվում

Թավշյա հեղափոխությունից հետո քանիցս է գրվել, որ դժվարացել է ԵՄ անդամ երկրներում Հայաստանի քաղաքացիների կողմից ապաստան ստանալը, հայցերն ավելի շատ են մերժվում, իսկ որոշակի կարգավիճակ չունեցող ՀՀ քաղաքացիներն էլ արտաքսում են։ Դե պարզ է, եվրոպացիներն ամենևին էլ միամիտ չեն, նրանք տարիներ շարունակ հետևել են հայաստանյան իրադարձություններին, ընտրությունների ժամանակ ծեծ ու ջարդի դեպքերին, հալածանքներին, որոնք էլ Հայաստանի շատ քաղաքացիների մղել են իրենց հետագա ճակատագիրը կապել եվրոպական ապահով և բարեկեցիկ երկրների հետ։ Եվ վերջին մեկուկես տարվա ընթացքում եվրոպացիները դիտարկել ու համոզվել են, որ Հայաստանն ապահով երկիր է, որտեղ չեն ոտնահարվում մարդու իրավունքներն ու ազատությունները։

Ըստ ՀՀ տարածքային կառավարման և ենթակառուցվածքների նախարարության միգրացիոն ծառայության տվյալների՝ այս տարվա սեպտեմբերի 5-ին Գերմանիայից 45 հայերի են արտաքսել Հայաստան։ Նրանց տեղափոխել են մեկ ինքնաթիռով։

Սպասվում է, որ ոչ միայն Գերմանիայից, այլև ԵՄ անդամ այլ երկրներից ևս հայերի կարող են արտաքսել։ Ի՞նչ է պատրաստվում անել Հայաստանի կառավարությունը, ի վիճակի՞ է ընդունելու տարբեր երկրներից եկող իր հայրենակիցներին, որոնց մեծ մասն արտագաղթել է՝ վաճառելով իր բնակարանը, կորցնելով նախկին աշխատանքն ու սոցիալական կապերը։

Միգրացիոն ծառայության հանրային կապերի պատասխանատու Նելլի Դավթյանը մեզ հետ զրույցում նշում է, որ արդեն հանրային քննարկման է դրվել «ՀՀ վերադարձող քաղաքացիների վերաինտեգրմանն ուղղված առաջնային աջակցության պետական ծրագրի մասին» ՀՀ կառավարության որոշումը, որի վերաբերյալ ակնկալում են կարծիքներ, առաջարկներ։ Նելլի Դավթյանը հիշեցնում է, որ առաջին անգամ պետությունն իրականացնում է վերաինտեգրման ծրագիր, որի համար պետությունը բյուջեից կատարելու է հատկացումներ, չնայած «Հետընդունման (ռեադմիսիա) մասին» համաձայնագիրը գործում է 2013 թվականից։

Միգրացիոն քաղաքականության խստացումը հանգեցրել է արտերկրից մեծ թվով հայերի հոսքի։

«Ամենամեծ հոսքը Գերմանիայից է։ Գերմանիայի փախստականների հարցերով դաշնային գրասենյակը վերջին տարիներին իր աշխատակիցների քանակը մի քանի անգամ ավելացրել է, ինչը նշանակում է, որ անգամ մինչև երկու տասնյակ տարիներ ձգվող հայցերը քննվում են հաշված օրերի ընթացքում։ Այսինքն՝ պրոցեսը միշտ էլ եղել է, բայց այս օրերին արագացել է, քանի որ ԵՄ անդամ երկրները չունեն այն ռեսուրսները, որ կարողանան այդ քանակությամբ ապաստան հայցողների ապահովել կացարանով և մնացած ծառայություններով»,- ասաց Նելլի Դավթյանը։

Մեր զրուցակիցը նկատում է, որ արտերկրում տարիներ շարունակ բնակված մեր քաղաքացիները վերադառնում են խիստ խոցելի վիճակով, և իրենք էլ փորձում են աջակցել վերադարձող քաղաքացիներին։ Ծրագրով նախատեսված է ոչ միայն խորհրդատվական աջակցություն ցուցաբերել, այլև սուբսիդիա տրամադրել 38 ընտանիքների՝ 60 հազար դրամի չափով, մինչև վեց ամիս ժամկետով՝ որպես բնակվարձի փոխհատուցում։

Նելլի Դավթյանը նշեց, որ Գերմանիան Հայաստան արտաքսված քաղաքացիներին աջակցում է և՛ ավիատոմսերով, և՛ կանխիկ գումարով, անգամ ամիսներ շարունակ աջակցում են։

«Այսինքն՝ պետք է համագործակցել և՛ Գերմանիայի իշխանությունների հետ, և՛ Հայաստան վերադառնալուց հետո ընդգրկվել մեր ծրագրերում, որպեսզի վերաինտեգրման գործընթացը հարթ ընթանա։ Այս պահին միգրացիոն ծառայությունում գործընթացն իրականացնում է Վերադարձի և վերաինտեգրման եվրոպական ցանցը՝ միգրացիոն քաղաքականության մշակման միջազգային կենտրոնի հետ համատեղ։

Իրենք պետք է ընդունեին 400 շահառուի, թիվը վաղուց լրացվել է, նույն ձևով շարունակվում է աջակցությունը հարկադիր վերադարձող քաղաքացիների»,- նշեց Նելլի Դավթյանը։

Հայտնի է, որ 2018թ․ ընթացքում «Հայկական Կարիտաս» ԲՀԿ կողմից իրականացվող ծրագրերի շրջանակներում 95 ընտանիքից ժամանակավոր կացարան ստանալու կարիք ունեցել է 21-ը, որը կազմում է ծրագրերի շահառուների 22 տոկոսը։ «ERRIN Հայաստան» ծրագրի շրջանակներում 2018թ․ նոյեմբերից մինչև 2019թ․ հունիսը տան վարձակալության համար դիմել է 31 անձ, սակայն աջակցություն ստացել է միայն 10 շահառու՝ դիմողների մոտ 32 տոկոսը։

Նյութի աղբյուրը՝ 1in.am