Պետական մակարդակով՝ խուլիգանություն. Չի եղել բացառիկ հանրային գերակա շահ, եղել է «Ռոբերտ Քոչարյանի կարիք»

Ազգային ժողովի պաշտոնական կայքից տեղեկանում ենք, որ հոկտեմբերի 7-ին՝ ժամը 10։00-ին, Հայաստանի Հանրապետության Ազգային ժողովի նիստերի դահլիճում ՀՀ ԱԺ նախագահ Արարատ Միրզոյանի նախաձեռնությամբ տեղի կունենան փաստահավաք խորհրդարանական լսումներ «Պետության կողմից «Հյուսիսային պողոտա-Կասկադ» ծրագրով բացառիկ գերակա հանրային շահ ճանաչելու հետևանքով սեփականության իրավունքի ոտնահարման խնդիրները» թեմայով։

2006 թվականին Հայաստանում ընդունվեց «Հասարակության և պետության կարիքների համար սեփականության օտարման մասին» օրենքը, որով սահմանվեցին բացառիկ գերակա հանրային շահ ճանաչելու հիմքերն ու պայմանները։ Ինչպես յուրաքանչյուր օրենք Հայաստանի Հանրապետությունում, այս օրենքը նույնպես միտված էր ծառայելու նեղ շրջանակի շահերի։ Գերակա շահի շղարշի տակ ունեզրկվեցին բազմաթիվ քաղաքացիներ, քանդվեցին բազմաթիվ պատմամշակութային հուշարձաններ, զավթվեցին տարածքներ և կտրվեցին հազարավոր ծառեր։

Այսօր սրա քաղաքական և իրավական գնահատականներից տրվե՞լ են, թե՞ ոչ․ «Առաջին լրատվական»-ի հարցին «Պետական կարիքների զոհեր» ՀԿ նախագահ Սեդրակ Բաղդասարյանը պատասխանեց․ «Իհարկե, ոչ, որի համար շատ եմ ցավում։ Ժամանակին ես դիմեցի նախարար Հասմիկ Պողոսյանին, հեղափոխությունից հետո շատ քիչ ժամանակ այդ պաշտոնը զբաղեցնում էր Մակունցը։ Ես խնդրեցի, որ նրանք տան գնահատական այդ կատարվածին, և բերեցի օրինակներ, որոնք ցույց են տալիս, թե ինչպիսի հանցագործություններ են տեղի ունեցել»։

Իսկ «Իմ քայլը» խմբակցության պատգամավոր Արուսյակ Ջուլհակյանն էլ ասաց․ «Նախ նշեմ, որ, ցավոք սրտի, առ այսօր իրավական գնահատական չի տրվել այս գործողություններին։ Այս տարվա հուլիսին, երբ մենք ՄԻԵԴ-ից ստացանք վճիռ՝ Բուզանդի փողոցի ունեզրկված քաղաքացիներից մեկի՝ Յուրի Վարդանյանի դիմումի հիման վրա։ Ըստ որի՝ Հայաստանի Հանրապետությունը պարտավորվում է վճարել Յուրի Վարդանյանին 1,6 միլիոն եվրո փոխհատուցում։ Այս առումով ես իրավապահ մարմիններին հորդորեցի, որ օբյեկտիվ քննություն իրականացնեն՝ «Հետքի» ժամանակին հրապարակած հարցազրույցի հետ կապված, և համապատասխան հիմքերի առկայություն բացահայտելու դեպքում քրեական գործ հարուցեն։ Պետք է նշեմ, որ այժմ քրեական գործ հարուցվել է և այն գտնվում է ընթացքի մեջ»։

Մանրամասները՝ 1in.am-ի տեսանյութում։