Նորաշենի նոր գյուղապետը ոստիկանների և ԱԻՆ-ի աշխատակիցների հետ կոտրել է համայնքապետարանի դուռը և մտել ներս. բնակիչ (Տեսանյութ)
Արարատի մարզի Նորաշեն համայնքի նոր համայնքապետ Արտակ Հարությունյանը այսօր՝ հոկտեմբերի 4-ին, ԱԻՆ-ի աշխատակիցների եւ ոստիկանների ուղեկցությամբ մուտք է գործել համայնքապետարան։ Այս մասին NEWS.am-ի հետ զրույցում հայտնեց համայնքի բնակչուհի Ալինա Կարապետյանը։
Նշենք, որ Նորաշենի բնակիչները դեմ են նոր համայնքապետի նշանակմանը։ Նրանք զգուշացնում էին, որ թույլ չեն տալու նոր համայնքապետին մուտք գործել համայնքապետարան։ Նախօրեին բնակիչները հանդիպել են Տարածքային կառավարման և ենթակառուցվածքների նախարարության ներկայացուցչի հետ, որը, բնակիչների խոսքով, խոստացել է հարցին լուծում տալ։
«Ասաց՝ լինելու է բնակիչների սրտով, եթե ուզում են՝ համայնքապետը լինի Աշոտ Ստեփանյանը, ապա այդպես էլ կլինի, բայց հենց հաջորդ օրը, այսինքն՝ այսօր Գարիկ Սարգսյանի սրտով նշանակված համայնքապետ Արտակ Հարությունյանը մտավ համայնքապետարան՝ դուռը կոտրելով։ Իր հետ էին նաեւ մի խումբ ոստիկաններ եւ ԱԻՆ-ի աշխատակիցներ։ Արարատի մարզպետը երեւի թքած ունի նաեւ Սուրեն Պապիկյանի խոսքի վրա, նրա խոսքի վրայով էլ անցավ, բայց մենք այսպես չենք թողելու»,- ասաց բնակչուհին։
Նա պատմեց, որ չեն միջամտել նրանց գործողություններին. «Ոչինչ չարեցինք, չէինք ուզում, որ բախումներ լիներ։ Մենք լուռ թողեցինք ու հետ գնացինք մեր տները։ Մարզպետը այս ամենի համար պետք է պատասխան տա»։
Հիշեցնենք, որ Նորաշենի բնակիչները երեկ բողոքի ակցիա էին իրականացնում Կառավարության դիմաց՝ պահանջելով իրենց նախկին համայնքապետ Նորայր Գրիգորյանին վերադարձնել իր պաշտոնին։
Ավելի վաղ հայտնել էինք, որ Նորաշենի ավագանու արձանագրության համաձայն դադարեցվել են գյուղապետ Նորայր Գրիգորյանի լիազորությունները: Վերջինիս կողմնակիցները դուրս են եկել բողոքի եւ հայտարարում են, որ այդ որոշումն անօրինական է, որ չկա ավագանու նիստի արձանագրություն, որն իրավազոր կլինի: Ակցիայի մասնակիցները գյուղապետի գլխավորությամբ պահանջում են իրենց ներկայացնել այդ արձանագրությունը, որի հիման վրա Տարածքային կառավարման եւ ենթակառուցվածքների նախարությունը դադարեցրել է գյուղապետի լիազորությունները:
Նորայր Գրիգորյանը հայտարարել էր, որ մարզպետի հետ իր հարաբերությունները լարվել են, երբ ինքը ընտրությունների ժամանակ պաշտպանել է այլ թեկնածուի՝ Սերգեյ Ատոմյանին, ով նույնպես պատգամավոր է ընտրվել «Իմ քայլը» խմբակցությունից: