на Русском
Վարչապետ Փաշինյանն ընդունել է Բրիս Ռոքֆոյին
«Պորշ»-ից գողացել են համարանիշը, տեղադրել իրե... 
Անդրանիկ Քոչարյանի ձևակերպումը գեղեցիկ չէր. Արարատ Միզորյան
ԱԺ նախագահ Արարատ Միզորյանը «Իմ քայլը» խմբակցության պատգամավոր Անդրանիկ Քոչարյանի ձեւակերպումը ԱԺ նախկին փոխնախագահ Արփինե Հովհաննիսյանի հասցեին՝ գեղեցիկ չի համարում։
«Դե տեսեք, կարծում եմ՝ ինչ խոսք, գեղեցիկ չէր ձեւակերպումը, բայց ես կարծում եմ, որ դա ոչ միայն կոնկրետ Անդրանիկ Քոչարյանի դեպքում, մենք տեսնում ենք վերջին ամսիներին Հայաստանում բանավեճի կամ քննադատության մեջ անկախ ո՞ր անձից որ անձի նկատմամբ, մի տեսակ ոչ վայելուչ ձեւակերպումներն, իհարկե, անցանկալի են, կարիք չկա դրանց, կարելի է ավելի բովանդակալի խոսել»,- այս մասին այսօր՝ հոկտեմբերի 4-ին, լրագրողների հետ զրույցում ասաց Միզորյանը։
Նա կոչ արեց քաղաքական գործիչներին՝ պահպանել քաղաքական բանավեճի ընթացքում կոռեկտության սահմանները եւ հարգալից վերաբերմունքը միմյանց նկատմամբ. «Իմ համոզմամբ, Արփինե Հովհաննիսյանի կողմից Դանիել Իոնիսյանին հիվանդ անվանելը, Արդարադատության նախարարին՝ անուղեղ, դրանք արդեն հիմք չեն տալիս մեկ այլ մարդուն, որ նույն բառապաշարով, նույն ոճով հակադարձել, կարծում եմ, որ տգեղ է»։
ԱԺ-ում Էթիկայի հանձնաժողովի ստեղծման վերաբերյալ Միզորյանն ասաց՝ լավ կլինի Արփինե Հովհաննիսյանը մի կարճ պարզաբանում տա այն մասին, թե ինչո՞ւ էթիկայի հանձնաժողով չի ստեղծվել մինչեւ այդ.
«Քանի որ ոչ կոռեկտ, անձնական վիրավորանքներով լի ձեւակերպումներ են եղել իրենց ժամանակ տարբեր պատգամավորների կողմից։ Ես սա էլ եմ համարում լուրջ դեպք, բայց կարծում եմ, որ Էթիկայի հանձնաժողովը չափազանց լուրջ դեպքերի է վերաբերում, եթե այս գործիքը սկսի չարաշահվել, ապա կարող է յուրօրինակ մահակ հանդիսանալ պատգամավորներին, եւ դա նրանց կարող է կաշկանդել քաղաքական գործունեությունն ու իրենց դիրքորոշումն այս կամ այն հարցով հայտնելու համար»։
Հիշեցնենք, որ Անդրանիկ Քոչարյանն իր հարցազրույցներից մեկում վիրավորական արտահայտություն էր արել Արփինե Հովհաննիսյանի հասցեին, որը բուռը քննարկման առիթ էր հանդիսացել։
Այնուհետև նա հայտարարել էր, թե՝ «Արփինե Հովհաննիսյանից ներողություն չեմ պատրաստվում խնդրել»:
Ես Անդրանիկ Քոչարյանի փոխարեն ներողություն եմ խնդրում, ասել էր Սասուն Միքայելյանը:
Արփինե Հովհաննիսյանն էլ գրառմամբ պատասխանել էր՝ Ամենաշատը ու անկեղծը գնահատում եմ Անդրանիկ Քոչարյանի ՆԵՐՈՂՈւԹՅՈւՆ Չխնդրելը:
