Ավստրիայի խորհրդարանական ընտրություններում Կուրցի պահպանողականները հաղթել են ձայների 37,5 տոկոսով
Ավստրիայի Ազգային խորհրդի (խորհրդարանի ստորին պալատ) ընտրություններում 37,5 տոկոս ձայներով (71 պատգամավորական մանդատ) հաղթել է պահպանողական Ավստրիական ժողովրդական կուսակցությունը՝ իր նախագահ Սեբաստյան Կուրցի գլխավորությամբ: Այս մասին հայտնել է երկրի ՆԳ նախարարությունը ավստրիացիների բոլոր ձայները հաշվելուց հետո՝ հաշվի առնելով փոստով կատարված արտահերթ քվեարկությունը: Ավստրիայի ՆԳՆ-ն զբաղվում է ընտրությունների կազմակերպմամբ եւ վերահսկում է դաշնային ընտրական հանձնաժողովների աշխատանքը, փոխանցում է ՏԱՍՍ-ը:
Ավստրիայի Սոցիալ-դեմոկրատական կուսակցությունը զբաղեցնում է երկրորդ տեղը՝ ձայների 21,2 տոկոսով (40 մանդատ): Սա խորհրդարանական ընտրություններում սոցիալ-դեմոկրատների ամենավատ արդյունքն է: Երրորդ տեղում է Ավստրիական աջ ազատության կուսակցությունը՝ ձայների 16,2 տոկոսով (31 մանդատ): Նման արդյունքը կուսակցությանը մեծ հիասթափություն է պատճառել, որը, նրա ղեկավարության խոստովանությամբ, կարող է դուրս մնալ նոր կառավարությունից:
Չորրորդը «Կանաչներն» են՝ ձայների 13,8 տոկոսով (26 մանդատ): Նրանք կարողացել են 2017 թվականի ձախողված ընտրություններից հետո վերադառնալ Ազգային խորհուրդ: «Նոր Ավստրիա» լիբերալ կուսակցությունը ձայների 8,1 տոկոսով 5-րդ տեղում է (15 մանդատ): Մնացյալ քաղաքական շարժումները չեն կարողացել հաղթահարել խորհրդարան անցնելու 4-տոկոսանոց շեմը:
Ավստրիայի նոր գումարման Ազգային խորհուրդ կանցնեն 5 քաղաքական կուսակցություններ: Ընտրություններին ընտրողների մասնակցությունը կազմել է 75,6 տոկոս: Դաշնային ընտրական հանձնաժողովը արդյունքները կհաստատի հոկտեմբերի 16-ին: