«Սանիթեք»-ի մատակարար ընկերությունները պահանջում են վճարել պարտքերը

«Սանիթեք» ընկերության հետ պայմանագրեր կնքած մատակարար ընկերությունները հավաքվել են «Սանիթեք»-ի շենքի դիմաց, պահանջում են իրենց վճարել 2 ամսվա պարտքերը։ «Էվէ կոմ» ՍՊԸ ներկայացուցիչ Համբարձում Առաքելյանը NEWS.am-ի հետ զրույցում ասաց, որ ավելի քան 20 ընկերության ներկայացուցիչ է եկել «Սանիթեք»-ի շենքի դիմաց։

«Մեր ընկերությանը «Սանիթեք»-ը պարտք է 6 միլիոն 770 հազար։ Մենք երկար ժամանակ է աշխատել ենք իրենց հետ, իրենք փողերը միշտ տվել են, սակայն վերջին 2 ամիսները չեն վճարում։ Այս պահին 20 ընկերություն կա, սակայն ըստ տեղեկությունների՝ 60-ից ավելի ընկերության չի վճարել ընկերությունը»,–նշեց նա։

Համբարձում Առաքելյանը նշեց, որ իրենք պահեստամասեր ենք մատակարարել, կան յուղ, անվադողեր մատակարարած ընկերություններ։

Մատակարար ընկերության ներկայացուցչի խոսքով՝ «Սանիթեք»-ի ներկայացուցիչները իրենց հայտնել են, որ պետք է սպասեն մինչեւ դատական պրոցեսը քաղաքապետարանի հետ ավարտվի. «Մեզ ասել են՝ դատի ենք տվել, դատից հետո կվճարենք»։

Նա հայտնեց, որ եթե իրենց խնդիրը չլուծվի, վաղը պատրաստվում են բողոքի ակցիա իրականացնել կառավարության շենքի դիմաց։

Հիշեցնենք, որ Երեւանի քաղաքապետարանը «Սանիթեք» ընկերությանն է փոխանցել ընդհանուր առմամբ 160 միլիոն դրամ՝ հորդորելով «Սանիթեք» ընկերությունների ղեկավարությանը՝ այդ միջոցներն առաջնահերթ ուղղել սեփական աշխատակիցների նկատմամբ ունեցած աշխատավարձային պարտավորությունների կատարմանը։

Երեւանի քաղաքապետ Հայկ Մարությանը այսօր երեւանցիներին ուղղված տեսաուղերձում հայտնել է, որ ամբողջությամբ խզել է «Սանիթեք» ընկերության հետ պայմանագրերը։