Վառելիքի մանրածախ շուկայում խնդիրները տեսանելի են անզեն աչքով. ՏՄՊՊՀ նախագահ

Վառելիքի մանրածախ շուկայում խնդիրները տեսանելի են անզեն աչքով, շատ ավտոլցակայաններ չեն պահպանում օրենքի նորմերը: Այս մասին հոկտեմբերի 3-ին կառավարությունում լրագրողների հետ զրույցում ասաց Տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Գեղամ Գեւորգյանը՝ հավելելով, որ իր կառույցը զբաղվում է միայն տնտեսական մրցակցության հարցերով:

Նա նշեց, որ ուսումնասիրություններ են կատարվում արդեն 3 ամիս, եւ հանձնաժողովի գործունեության նպատակն այն է, որպեսզի տնտեսական պրոցեսներն ընթանան առանց ցնցումների:

«Մենք չենք կարող ներխուժել շուկա, այլ միայն կարող ենք ուղղորդել ընկերություններին եւ բացառել անբարեխիղճ մրցակցությունը»,- նկատեց Գեւորգյանը:

Նա հավելեց, որ բենզինի գները կախված են միջազգային գներից, իսկ Հայաստանի համար՝ Ռուսաստանի գներից, ինչպես նաեւ տրանսպորտային ծախսերից:

«Հայաստանի եւ Ռուսաստանի միջեւ համաձայնագրով Ռուսաստանը մատակարարում է 150 հազար տոննա բենզին հարկերից ազատված գներով: Այդ ծավալը բաշխվում է հայկական 3 հիմնական ներմուծողների միջեւ: Շուկայում օրինակ Իրանից կամ այլ երկրներից վառելիքի հայտնվելու դեպքում կզգացվի նաեւ գնային տարբերությունը»,- ընդգծեց Գեւորգյանը՝ հավելելով, որ ինքը չի կարող տվյալներ հրապարակել այն մասին, թե կան արդյոք արհեստական խոչընդոտներ Վրաստանի տարածքում Հայաստան վառելիքի ներմուծելիս:

Անդրադառնալով շաքարի ներմուծմանը՝ ՏՄՊՊՀ նախագահը նշեց, որ կարեւոր է ոչ այն, թե որքան շաքար են ներմուծում փոքր ընկերությունները, այլ այն, թե ինչպիսին է նրանց բաժինը շուկայում։ «Փոխվել է փոքր ընկերությունների կողմից ներկրվող շաքարի բաժնի տոկոսային հարաբերակցությունը։ Դա հանգեցրել է այն բանին, որ «Ալեքս-Գրիգ» ընկերության բաժինը շուկայում նվազել է 20 տոկոսով»,- հավաստիացրել է նա։

Անդրադառնալով ալկոհոլի շուկայում տիրող իրավիճակին՝ պաշտոնյան ասել է, որ ՏՄՊՊՀ-ն հետազոտություններ է կատարում, եւ խախտումներ այդ ոլորտում կան, օրինակ, երբ բրենդային ընկերության շշում վաճառում են այլ ապրանք, եւ դա վերաբերում է ինչպես հայկական կոնյակին, այնպես էլ ներկրվող այլ ալկոհոլային խմիչքների։

ՏՄՊՊՀ նախագահը նշել է, որ իրականացվում են հետազոտություններ նաեւ տեխնիկայի շուկայում։ «Հայտնի է, որ բջջային օպերատորները եւ որոշ ընկերություններ վաճառում են մի քանի ապրանք, եւ դրանց մի մասը նրանց համար զրոյական եկամտաբերություն ունի։ Օրինակ, բջջային օպերատորը կարող է վաճառել հեռախոս եւ ինտերնետ, բայց ընկերության համար դրանցից մեկի եկամուտը կարող է լինել զրոյական։ Այս խնդիրը կա ամբողջ աշխարհում»։

Անդրադառնալով Շաքարավազի շուկայում ՏՄՊՊՀ–ի կողմից իրականացվող ստուգումներին, բանախոսն ասել է, որ նոր ներկրողներ են հայտնվել: Հարցին, թե վերջին մեկ տարվա ընթացքում «Ալեքս Գրիգ» ընկերության կողմից շաքարավազի գնի իջեցումը արդյոք դեպինգ չէ, Գեղամ Գևորգյանն արձագանքել է.

«Շաքարավազի գնի իջեցումը դեմպինգի պատճառով տեղի չի ունեցել։ Այն տատանվում է բորսայում առկա գնի շուրջ։ Ուրախալին այն է, որ այս շուկայում հայտնվում են նաև այլ ներկրողներ։ Ոչ թե ներմուծողների քանակն է կարևոր, այլ նրանց մասնաբաժինը։ Եթե քանակը լինի 100 հոգի, բայց նրանք բոլորը միասին կազմում են 1-2 տոկոս, ապա դա մեր կյանքում ոչինչ չի փոխում»,-նշեց Գևորգյանը։

Վերջինս ընդգծել է, որ «Ալեքս Գրիգի» մասնաբաժինը շուկայում 20 տոկոսով նվազել է։

Գեղամ Գևորգյանը հավելեց, որ Հայաստանում շաքարավազի ոլորտում ավելի մեծ խնդիր է շաքարավազի արտադրությունը. «Հայաստանում չկա շաքարավազի արտադրություն»,-նշել է նա։