Մոսկվայում ձերբակալվել է «Աէրոֆլոտ»-ի գլխավոր տնօրենի տեղակալը

Մոսկվայի Բասմանի դատարանը մինչեւ նոյեմբերի 30-ը կալանք է սահմանել «Աէրոֆլոտ» ավիաընկերության գլխավոր տնօրենի տեղակալ Վլադիմիր Ալեքսանդրովի նկատմամբ 250 մլն ռուբլի հափշտակելու գործով, հաղորդում է BFM-ը:

Ալեքսանդրովը ձերբակալվել է հոկտեմբերի 2-ին իրավաբանական գործարքներ կնքելիս խարդախությունների կասկածանքով:

Ձերբակալվել են նաեւ փաստաբաններ Դինա Կիբեցը, Ալեքսանդր Սլիվկոն եւ ավիաընկերության իրավաբանական դեպարտամենտի նախկին ղեկավար Տատյանա Դավիդովան:

Քննության վարկածով՝ Ալեքսանդրովը 2016-2017-ին անհիմն կերպով 250 մլն ռուբլի է փոխանցել իրավաբանական ծառայություններ մատուցելու պայմանագրով, ապա այդ միջոցները հափշտակվել են:

Ավիաընկերության գործընկեր է դարձել իրավաբանական ընկերությունը, որտեղ աշխատել են Դինա Կիբեցն ու Ալեքսանդր Սլիվկոն, որոնց մեկ ժամի համար 350 եվրո են վճարել, չնայած՝ նրանք իրենց աշխատանքը չեն կատարել:

Վլադիմիր Ալեքսանդրովը ծագումով հայ է, ծնվել է Ուզբեկստանում: 2004-ին նա իր հայկական անունն ու ազգանունը՝ Արմեն Աբալյան, փոխել է՝ դառնալով Վլադիմիր Ալեքսանդրով: