Բեզոսը կրկին գլխավորել է Forbes-ի վարկածով ԱՄՆ ամենահարուստ մարդկանց ցուցակը
Amazon ընկերության հիմնադիր Ջեֆ Բեզոսը երկրորդ անգամ անընդմեջ գլխավորում է ԱՄՆ 400 ամենահարուստ մարդկանց ցուցակը, հայտնում է ՏԱՍՍ-ը՝ վկայակոչելով Forbes-ին:
Ամսագիրը բիզնեսմենի կարողությունը գնահատել է 114 մլրդ դոլար: Ամենահարուստ բիզնեսմենների վարկանիշն ամբոջական կհրապարակվի չորեքշաբթի՝ հոկտեմբերի 2-ին:
Պարբերականը նշում է, որ Բեզոսին «չի խանգարել անգամ կնոջ՝ Մաքենզիի հետ թանկարժեք ամուսնալուծությունը», որը ստացել է Amazon-ի 19,7 մլն դոլարի բաժնետոմսերը (ընկերության գրեթե 4 տոկոսը): Իրեն՝ ձեռնարկատիրոջն է մնացել արժեթղթերի 12 տոկոսը: Հուլիսի սկզբին պաշտոնական ամուսնալուծության պահին Amazon-ի 4 տոկոսն արժեր 38,3 մլրդ դոլար:
Forbes-ի փորձագետները վարկանիշը կազմելիս հաշվի են առնում ոչ միայն ձեռնարկատերերի կարողությունը, այլ նաեւ այն, թե նրանք կարողության որ մասն են «ինքնուրույն ստեղծել»: Այս նպատակով ամսագիրը գնահատում է, թե ցուցակում ընդգրկվածը գումարի որ մասն է ժառանգել, որքան հարուստ էին նրա ծնողները, ինչպես նաեւ այն, թե նա կյանքում ինչպիսի դժվարությունների է բախվել: 2018 թվականից ամսագիրը նաեւ սկսել է չափել «բարերարության մակարդակը». լրագրողները գնահատում են այն միջոցների ծավալը, որը բիզնեսմենները փոխանցել են բարեգործությանը, եւ այն, թե այդ գումարը նրանց ընդհանուր կարողության որ մասն է կազմում:
Բեզոսը մարտին երկրորդ անգամ անընդմեջ գլխավորել էր մոլորակի ամենահարուստ բիզնեսմենների վարկանիշը: Ամսագիրն այդ ժամանակ նրա կարողությունը գնահատել էր 131 մլրդ դոլար: