Մեկնարկել է «Երեխաների իրավունքների վրա հիմնված մոտեցմամբ ընտանիքում բռնության դեպքերի կանխարգելման նպատակով» ծրագիրը
Արդարադատության նախարարի տեղակալ Քրիստիննե Գրիգորյանն այսօր մասնակցել է «Հայաստանի ներուժի ամրապնդում ՄԻՊ ազգային ռազմավարությունից բխող Գործողությունների ծրագիրը պատշաճ իրականացնելու համար՝ երեխաների իրավունքների վրա հիմնված մոտեցմամբ ընտանիքում բռնության դեպքերի կանխարգելման եւ արձագանքման նպատակով» ծրագրի մեկնարկին: Այն իրականացվում է Մեծ Բրիտանիայի եւ Հյուսիսային Իռլանդիայի Միացյալ Թագավորության դեսպանության աջակցությամբ:
Ծրագրի նպատակն է ՀՀ-ում զարգացնել միջգերատեսչական արձագանքման մեխանիզմները՝ կանխարգելելու եւ արձագանքնելու ընտանեկան բռնության դեպքերը, խթանելու երեխաների իրավունքների վրա հիմնված մոտեցումը ընտանեկան բռնության դեպքերի առնչությամբ, ինչպես նաեւ ամրապնդել ԶԼՄ-ների կարողությունները` ընտանեկան բռնության դեպքերում հանրության հետ արդյունավետ հաղորդակցության նպատակով:
Կարեւորելով միջգերատեսչական համագործակցությունը երեխաների իրավունքների վրա հիմնված մոտեցումների, կառուցակարգերի եւ ընթացակարգերի բարելավման գործընթացում՝ փոխնախարար Գրիգորյանը անդրադարձ է կատարել Արդարադատության նախարարության դիրքորոշմանը երեխաների իրավունքների պաշտպանության հարցում՝ ընդգծելով, որ այդ ուղղությամբ նախատեսված աշխատանքների պլանավորումը ներառված է Մարդու իրավունքների պաշտպանության ազգային ռազմավարության շրջանակում։
Միջոցառմանը բացման խոսքով եւ ելույթով են հանդես եկել նաեւ «Իրավական կրթության եւ վերականգնողական ծրագրերի իրականացման» ՊՈԱԿ-ի տնօրենի տեղակալ Գայանե Հովակիմյանը, ՀՀ ԱՆ ՔԿԱԳ գործակալության պետ Անի Մխիթարյանը, Ծրագրի փորձագետ Դավիթ Թումասյանը, Ծրագրի փորձագետ Անահիտ Խաչատրյանը, այլք:
Ծրագրի շրջանակում նախատեսվում է կարողությունների զարգացման երկօրյա թրեյինգ համայնքային սոցիալական աշխատողների եւ արդարադատության աշխատակիցների համար երեխաների առեւանգման դեպքերին միջգերատեսչական, բազմակողմանի արձագանքի վերաբերյալ, ընտանեկան բռնության դեպքերում երեխայակենտրոն իրավունքի մոտեցման վերաբերյալ քննիչների եւ արդարադատության աշխատակիցների համար ուղեցույցի մշակում, տպագրություն եւ տարածում, ԶԼՄ-ների, ՔՀԿ-ների, անկախ լրագրողների կարողությունների զարգացում ՝ ԸԲ զգայուն դեպքերի լուսաբանման նպատակով: