Ասանժի հայրը մեղադրել է բրիտանական բանտին որդուն կտտանքների ենթարկելու մեջ
WikiLeaks պորտալի հիմնադիր Ջուլիան Ասանժի հայրը՝ Ջոն Շիփթոնը, որդու բանտային պայմանները բրիտանական Բելմարշ բանտում անվանել է տառապալից, տեղեկացնում է ՌԻԱ «Նովոստի»-ն՝ հղում կատարելով The Independent-ին։
Ասանժի հայրն ասել է, որ բանտում որդին բախվում է վիթխարի ֆիզիկական եւ հոգեբանական տառապանքների եւ նկատելիորն նիհարում է։ Օգոստոսին հանդիպման ժամանակ որդին դողում էր եւ նյարդայնանում։
«Նա ենթարկվում է ամեն տեսակ կտտանքների»,- համոզված է Շիփթոնը։
Միեւնույն ժամանակ, Ասանժի հայրը չի կարող հավատալ, որ որդուն շարունակում են պահել երկրի ամենադաժան բանտերից մեկում՝ հակառակ նրան ազատ արձակելու ՄԱԿ կոչերի։ Նրա կարծիքով՝ այս իրավիճակում միակ իրավախախտները բրիտանական կառավարությունն ու թագավորական դատախազական ծառայությունն են։
Նախօրեին լրագրողի փաստաբան Կառլոս Պովեդան ՌԻԱ «Նովոստի»-ին տեղեկացրել էր, որ Ասանժը նախկինի պես լիակատար մեկուսացման մեջ է, միջանձնային հաղորդակցման համար օրական ընդամենը մեկ ժամ է հատկացվում։ Նա նաեւ ընդգծել է, որ ահավոր բանտային պայմանները հանգեցրել են լուրջ առողջական խնդիրների։
Ջուլիան Ասանժը հանրահռչակ դարձավ շնորհիվ նյութերի, որոնք մերկացնում են ԱՄՆ ապօրինի գործողությունները Աֆղանստանում եւ Իրաքում ռազմական գործողությունների ժամանակ։ Լրագրողը տվյալներ էր հրապարակել խաղաղ քաղաքացիների սպանությունների մասին մարտական գործողությունների ընթացքում, ինչպես նաեւ ամերիկյան Գուանտանամո (Կուբա) բանտի ահավոր պայմանների մասին։
2010 թվականին Շվեդիայում նրան մեղադրեցին սեռական ոտնձգությունների եւ բռնաբարության մեջ։ Ասանժը հերքում է այդ մեղադրանքները։ Նրա խոսքով՝ իր դեմ բողոք ներկայացրած կանայք գործել են վրեժից դրդված եւ իրավապահ մարմինների ճնշման ներքո։
2012 թվականից WikiLeaks-ի հիմնադիրը թաքնվում էր Լոնդոնում Էկվադորի դեսպանությունում։ 2019 թվականի ապրիլի 11-ի առավոտյան Ասանժին կալանավորեցին 2012-ին դատարան չներկայանալու պատճառով, ինչպես նաեւ Շվեդիայի եւ ԱՄՆ իշխանությունների պահանջով։
Մայիսի 1-ին լրագրողին դատապարտեցին 11 ամիս երկու շաբաթ ազատազրկման գրավի դիմաց ազատ արձակվելու պայմանները խախտելու համար։ Դրանից հետո ԱՄՆ իշխանությունները Ասանժին ներկայացրին նոր մեղադրանքներ լրտեսության եւ գաղտնի տեղեկատվության բացահայտման մեջ։ Այժմ նրան սպառնում է 175 տարի ազատազրկում։ Դատարանը պետք է ընդունի որոշում նրան Նահանգներին արտահանձնելու վերաբերյալ։
Մայիսի վերջին Ասանժին տեղափոխեցին Բելմարշի բժշկական բաժանմունք։ Նրա փաստաբանի խոսքով՝ լրագրողն այնքան վատ էր զգում, որ «նրա հետ անհնար էր նորմալ զրույց վարել»։