Բնակարան ձեռք բերելու հարցում պետությունը կաջակցի երիտասարդ ընտանիքներին կանխավճարով

Ժողովրդագրական իրավիճակի բարելավման խորհրդի նիստին հայտնի դարձավ, որ 2020 թվականից սկսած մեկնարկելու են ծնելիության խրախուսման, երիտասարդ և երեխաներ ունեցող ընտանիքների աջակցության նոր ծրագրեր։

Ի՞նչ ունեք առաջարկելու․ «Առաջին լրատվական»-ի հարցին ՀՀ աշխատանքի և սոցիալական հարցերի նախարարության ժողովրդագրության բաժնի պետ Արտակ Մարկոսյանը պատասխանեց․ «Բոլոր ծրագրերը նախատեսված են 2020 թվականի հուլիսի 1-ից։ Նշեմ, որ Ժողովրդագրական իրավիճակի բարելավման խորհուրդն արդեն գործում է վեց ամիս, որի աշխատանքները համակարգում է փոխվարչապետ Տիգրան Ավինյանը։ Սույն թվականի սեպտեմբերի 23-ի նիստի ժամանակ ազդարարվեց, որ 2020 թվականից սկսած մեկնարկելու են ծնելիության խրախուսման, երիտասարդ և երեխաներ ունեցող ընտանիքների աջակցության նոր ծրագրեր։

Վեց անգամ բարձրանալու է առաջին երեխայի ծննդյան միանվագ նպաստը՝ 50 հազար դրամից այն կդառնա 300 հազար դրամ։ Սա բավականին էական բարձրացում է, և այն մենք ոչ թե նպաստ ենք անվանում, այլ աջակցություն երեխայի նախնական ծախսերը հոգալու համար։ Այն 50 հազար դրամը, որ գործում է տաս տարուց ավելի, այլևս հարց չէր լուծում։

Կառավարության որոշմամբ երկու անգամ բարձրացվելու է երկրորդ երեխայի ծննդյան միանվագ նպաստի չափը՝ 150 հազար դրամից այն հասցնելով մինչև 300 հազար դրամ։ Արդյունքում ծնողները կկարողանան հոգալ երեխայի ծննդյան հետ կապված նախնական միանվագ ծախսերը։

Շուրջ 41 տոկոսով բարձրացվելու է աշխատող մայրերին տրվող ամսական նպաստը՝ 18 000 դրամից այն հասցնելով 25 500 դրամի։ Նշեմ, որ այստեղ շատ լրացուցիչ հանգամանք է ի հայտ եկել․ բացի աշխատող մայրերից, նպաստ կստանան նաև Հայաստանի գյուղական բնակավայրերի ծնող մայրերը»։

Մանրամասները՝ տեսանյութում։