Դեմոկրատները Պոմպեոյից պահանջել են ներկայացնել Ուկրաինայի հարցով փաստաթղթերը
ԱՄՆ Ներկայացուցիչների պալատի դեմոկրատները, որոնք նախաձեռնել են երկրի նախագահ Դոնալդ Թրամփի նկատմամբ իմպիչմենթի գործընթացը, ԱՄՆ պետքարտուղար Մայք Պոմպեոյից պահանջել են ներկայացնել Ուկրաինայի իշխանությունների հետ շփումներին առնչվող փաստաթղթերը, հաղորդում է Reuters-ը:
Նման պահանջ է ներկայացվել ԱՄՆ-ի ազգային անվտանգությունն ու ընտրությունների ամբողջականությունը վտանգող Թրամփի գործողությունների հետ մտահոգությունների ֆոնին օրենսդիրների ձեռնարկած հետաքննության մեկնարկից հետո:
Ներկայացուցիչների պալատի հետախուզության, վերահսկողության, արտասահմանյան գործերի գծով հանձնաժողովում մոտակա 2 շաբաթների ընթացքում ցուցմունքներ կտան նաեւ ԱՄՆ պետքարտուղարության 5 աշխատակիցներ, նրանց թվում՝ Ուկրաինայի հարցերով ԱՄՆ նախագահի հատուկ ներկայացուցիչ Քուրթ Վոլքերը, որը, մի շարք ԶԼՄ-ների տեղեկություններով, հրաժարական է տվել:
Վոլքերի հրաժարականի պատճառը դեռեւս հայտնի չէ: Պետքարտուղարությունը եւս չի մեկնաբանում այդ տեղեկությունը: