Չէին սպասում, որ կենթարկվեն պատասխանատվության. Սաֆարյանը՝ Ալիկ Սարգսյանի և մյուսների գործողությունների մասին. «Հայկական ժամանակ»

«Հայկական ժամանակ» թերթը գրում է.

«Նախօրեին ՀՔԾ-ի կողմից տարածած ծավալուն հաղորդագրությունում, բացի Ալիկ Սարգսանից, շոշափվում էր նաև այն ժամանակ ՀՀ նախագահի օգնական Գևորգ Կոստանյանի, ՀՀ ոստիկանության պետի տեղակալ Գևորգ Մհերյանի անունները: Բազմաթիվ դրվագներում խոսք էր գնում նաև ՀՀ նախկին ոստիկանապետ Հայկ Հարությունյանի, ոստիկանության պետի նախկին տեղակալ Ալեքսանդր Աֆյանի, ՀՀ ոստիկանության քրեական հետախուզության գլխավոր վարչության նախկին պետ Հայկ Միլիտոնյանի, վերջինիս նախկին տեղակալ Հովհաննես Թամամյանի, ոստիկանության Երևան քաղաքի վարչության պետ Ներսես Նազարյանի, ոստիկանության զորքերի շտաբի նախկին պետ Գեղամ Պետրոսյանի և այլոց մասին:

Մեր հարցերին պատասխանեց Մարտի 1-ի փաստահավաք խմբի նախկին անդամ Սեդա Սաֆարյանը:

– Տիկին Սաֆարյան, ՀՔԾ–ն երեկ հայտարարեց, որ ձեռք բերված ապացույցների համակցությամբ մեղադրանք է առաջադրվել ՀՀ նախկին ոստիկանապետ Ալիկ Սարգսյանին: Ընդհանրապես, ՀՔԾ հաղորդագրությունում բազմաթիվ այլ նախկին պաշտոնյաների անուններ էին շոշափվում: Նախկինում ձեր հավաքած տվյալները համապատասխանո՞ւմ էին այդ հաղորդագրությունում նշված տվյալներին:

– Դրանով ևս մեկ անգամ հաստատվեց, որ իրենք (իշխանությունները-խմբ.) 2008 թվականի մարտի 1-ին Ազատության հրապարակում որևէ օպերատիվ միջոցառում իրականացնելու հիմքեր, կասկածներ չեն ունեցել, և դա, կարելի է ասել, ինքնագործունեություն էր: Դրանից հետո որոշել են, որ պետք է գնան, ոստիկանությունում ստեղծեն զեկուցագրերի մեծ խումբ, որոնց բովանդակությունն այն էր, թե իբր մինչև մարտի մեկն էլ իրենց հայտնի է եղել, որ հանրահավաքի մասնակիցների մոտ զենքի կուտակումներ կան և այլն, և այլն: Էս կարգի տեղեկություններ փաստահավաք խմբում պահանջեցինք նաև Ազգային անվտանգության ծառայության պետ Գորիկ Հակոբյանից, նա մեզ չտրամադրեց դա, և հասկացանք, որ ամեն ինչ իմիտացիա է: Ինչևէ, էդ կեղծիքների համար, այո՛, Ալիկ Սարգսյանի գլխավորած կառույցը պատասխանատու է: Եվ պատահական չէ, որ նախագահականից էին ուղղորդվում էդ կեղծիքները և ամբողջ տեղաշարժը: Հետագայում, ինչպես գիտեք, Ալիկ Սարգսյանը նշանակվեց Սերժ Սարգսյանի խորհրդական. չգիտեմ ինչ խորհուրդ էր տալիս, բայց փաստորեն էդ խորհուրդների արդյունքում էսօր քրեական գործը համեմված է բազմաթիվ կեղծիքներով, ինչը համակարգային է և շատ ցավալի, որովհետև Ռոբերտ Քոչարյանից հետո Սերժ Սարգսյանը շարունակեց այն գիծը, որ իրենք տանում էին: Այդ գործընթացը (տվյալները կեղծելու-խմբ.), փաստորեն, հաջողված ավարտ ունեցավ: Ուղղակի երևի իրենք չէին սպասում, որ այս կարգի իրավիճակներ կլինեն, իրենք պատասխանատվության կենթարկվեն և էդ պատասխանատվությանը չեն դիմանա, շուտ-շուտ կասեն՝ ուզում ենք դուրս գանք, ինչո՞ւ բանտ նստենք, Էն մյուսը կասի՝ ուզում եմ ինքնասպան լինել, երրորդը կասի՝ հաշտության մթնոլորտ եմ ուզում, չորրորդը կասի՝ մենք տարաձայնություն ենք մտցնում Լեռնային Ղարաբաղի և Հայաստանի միջև, բայց մի անգամ հարց չեն տա Լեռնային Ղարաբաղի ժողովրդին՝ ա՛յ Լեռնային Ղարաբաղի ժողովուրդ, դուք մի անգամ դատապարտեցի՞ք ձեր որդիներին մեզ մոտ այս կարգի իրավիճակ ստեղծելու համար: Ուզում եմ ասել, որ ովքեր ինչ արել են՝ պիտի պատժվեն»:

Առավել մանրամասն՝ թերթի այսօրվա համարում: