Խաղարկվեց ոստիկանական ակադեմիայի մինի ֆուտբոլի գավաթը (Լուսանկար և տեսանյութ)
Հայաստանի Ոստիկանության ակադեմիայում 2016 թվականին Թովմասյան հիմնադրամի աջակցությամբ բացվել է մինի ֆուտբոլի խաղադաշտ, որտեղ 2017 թվականից անցկացվում է Հայաստանի Ոստիկանության ակադեմիայի գավաթի խաղարկությունը:
Սեպտեմբերի 27-ին տեղի ունեցավ մինի ֆուտբոլի առաջնության եզրափակիչ հանդիպումը եւ հայտնի դարձավ հաղթողը: Ֆուտբոլի մրցաշարը նվիրված է ոստիկանության գնդապետ, իրավաբանական գիտությունների թեկնածու Վարդան Պետրոսյանի հիշատակին:
Ոստիկանության կրթահամնալիրի մարտական եւ ֆիզիկական պատրաստության ամբիոնի պետ, գնդապետ Աշոտ Գրիգորյանի փոխանցմամ, մինի ֆուտբոլի մրցաշարը օգնում է ապագա ոստիկաններին լավ մարզավիճակում լինել: «Հուշամրցաշարն անցկացնում ենք արդեն երրորդ տարին: Մեկնարկում է ամեն տարվա մայիսին եւ ավարտվում սեպտեմբերին: Անցնում ենք 3-4 փուլ: Մասնակցում է 12 թիմ՝ ոստիկանության ակադեմիայի տարբեր կուրսերից կազմված: Ոստիկանության սպաների թիմ էլ ունենք: Այս հանդիպումների միջոցով հնարավորություն ենք ստանում ուսանողներին ավելի լավ ճանաչել: Այս տարվա եզրափակիչ են դուրս եկել կրթահամալիրի քոլեջի երկրորդ կուրսի եւ չորրորդ կուրսի թիմերը:
Հաղթեց կրթահամալիրի քոլեջի երկրորդ կուրսի թիմը եւ ստացավ գավաթը: Այս գավաթը ամեն տարի փոխանցվում է հաղթողին»,- ասաց գնդապետ Աշոտ Գրիգորյանը: Հուշամրցաշարի պաշտոնական հանդիպումից առաջ տեղի ունեցավ գնդապետ Վարդան Պետրոսյանի հիշատակին նվիրված վետերանների ընկերական խաղ: Վետերանների խաղին մասնակցում էր նաեւ Թովմասյան հիմնադրամի նախագահ Արտակ Թովմասյանը:
«Վարդան Պետրոսյանի հիշատակին նվիրված մինի ֆուտբոլի մրցաշարը կազմակերպվում է երրորդ տարին: Վետերանների ընկերական խաղն առաջին անգամ էինք անցկացնում: Վետերանների խաղին մասնակցում են Վարդան Պետրոսյանի ընկերներն ու գորընկերները: Ընկերների թիմն անվանել էինք «Վարդանանք», ես ինքս խաղում եմ հենց այդ թիմից: Ուրախ եմ, որ ակադեմիայի հետ ստացանք համաձայնություն եւ կազմակերպեցինք այս խաղը: Շատ կարեւոր է, որ պետության համար կարեւորություն ունեցող կառույցներում, կրթահամալիրներում ուշադրություն դարձվի սպորտին, քանի որ այն կարեւոր է: Սպորտը դա առողջություն է եւ ուրախ եմ, որ համագործակցություն կա ակադեմիայում: Ոստիկանը նաեւ պետք է լավ ֆիզիկական տվյալներ ունենա: Կրթահամալիրից ունեցանք համագործակցության եւ ստեղծվեց այս մինի մարզադաշտը: Հաճելի է, որ այստեղ ոստիկանները նաեւ խաղում են, մրցումներ անցկացնում»,- նշեց Արտակ Թովմասյանը:
Վետերանների ընկերական հանդիպումն ավարտվեց «Վարդանանք» թիմի հաղթանակով՝ 5:2: Գնդապետ Աշոտ Գրիգորյանը կատակեց, որ վետերանների խաղում պետք է հաղթեր Վարդան Պետրոսյանի ընկերների թիմը: «Իրականում կատակում եմ: Սպորտում հաղթում է ուժեղը, այստեղ էլ «Վարդանանք» թիմը մեզանից ուժեղ գտնվեց»,- հավելեց գնդապետը: