Ուսանողներին կրթաթոշակ տրամադրում է առանց քաղաքական նկատառումների. «Իմ քայլը» հիմնադրամ. (Տեսանյութ)
«Իմ քայլը» հիմնադրամը ուսանողներին կրթաթոշակ տրամադրում է առանց քաղաքական նկատառումների։ Այս մասին այսօր՝ սեպտեմբերի 27-ին, ասաց «Իմ քայլը» հիմնադրամի կրթական ծրագրերի համակարգող Արմեն Ներսեսյանը։
«Նպատակն է նպաստել Հայաստանի հարակայուն զարգացման առաջնահերթություններից բխող մարդկային կապիտալը, հնարավորություն տալ երիտասարդությանը, եւ բոլոր նրանց, ովքեր խնդիր ունեն ձեռք բերել գիտելիք, եւ ձեռք բերել այդ գիտելիքն ու լավագույն փորձը, գալ Հայաստան ու դրանք ներդնել հանուն Հայաստանի զարգացմանը։
Համապատասխանության չափորոշիչներն են՝ լինել Հայաստանի Հանրապետության քաղաքացի, դիմելու պահին լինել 18-40 տարեկան եւ ընդունված լինել ծրագրին բավարարող աշխարհի առաջատար բուհեր։ Որո՞նք են այդ առաջատար բուհերը, մենք հայտադիմումներ ենք ընդունում տվյալ մասնագիտությամբ աշխարհի լավագույն 20 համալսարաններ ընդունված ուսանողներից։ Որպեսզի կարողանան դիմել «Իմ քայլը» հիմնադրամի կրթաթոշակային ծրագրին՝ անհրաժեշտ է ընդունված լինել եւ ունենալ որոշ պայմանական հրավեր քո մասնագիտությամբ աշխարհի լավագույն 20 համալսարաններից որեւիցե մեկից։ Այդ 20 համալսարանները մենք վերցնում ենք այս 2 վարկանշային կարգերից, որոնք միջազգային վարկանշային կայքեր են եւ հրապարակում են ամեն տարի աշխարհի լավագույն համալսարանների ցանկեր, ինչպես նաեւ՝ ըստ մասնագիտության լավագույն ցանկեր։ Անհրաժեշտ է, որ գոնե այս վարկանշային ցանկերից մեկով ձեր համալսարանը բավարարի։ Շատ հնարավոր է, որ միեւնույն մասնագիտությամբ լինեն տարբեր ցանկեր, եւ անհրաժեշտ է ընդունվել այդ համալսարաններից որեւիցե մեկը» - ասաց Արմեն Ներսեսյանը։
Նա նշեց, որ իրենց ծրագրում սահմանել են առաջնահերթություններ, եւ առաջինը ակադեմիական ծրագրի առաջնահերթությունն է։ Նախեւառաջ առաջնահերթությունը տրվում է մագիստրատուրայի դիմորդներին. «Մենք կարեւորում ենք մագիստրատուրայի դիմորդների դերը՝ հաշվի առնելով նաեւ այն հանգամանքը, որ իրենց Հայաստան վերադառնալն ավելի շուտ կարող է տեղի ունենալ, քան մնացած այլ ծրագրերի դեպքում։ Այնուհետեւ՝ ասպիրանտուրան, սակայն մենք հիմնականում առաջնահերթություն ենք տալիս այն մասնագիտություններին, որոնք կապ ունեն Հայաստանի հետ կամ իրենց հետազոտության մեջ կա որեւիցե մասնիկ, որը վերաբերում է Հայաստանի զարգացմանը, տնտեսական վիճակի վերլուծությանը եւ այլն։ Եվ բակալավրիատ, սա երրորդ առաջնահերթությունն է, սակայն մենք չենք փորձել բացառել որեւիցե մեկին»։
Հարցին՝ արդյոք կրթաթոշակ տրամադրելիս հաշվի առնվում է քաղաքական ենթատեքստը, Ներսեսյանը պատասխանեց. «Ոչ, հաշվի են առնվում այն հանգամանքները, որոնք ներկայացրի։ Դրանից բացի նշված չէ ինչ-որ բան, մենք ընդհանրապես դա հաշվի չենք առնում։ Մեզ համար կարեւոր է, որպեսզի ուսանողն ընդունված լինի այն համալսարանը, որը բավարարում է մեր ծրագրին, իսկ երբ դու ընդունվում ես այդ համալսարանը՝ նշանակում է այդ համալսարանը գնահատել է քո կարողությունները, գիտելիքները, ու ֆինանսական վիճակը ընդունել է։ Մենք կարեւորում ենք ուսումնական հաստատությունների կարծիքը եւ ընտրությունը, եւ փորձում ենք աջակցել մեր ուսանողներին»։
Նա ասաց, որ կրթաթոշակի չափը հաշվարկելիս հաշվի է առնվում ուսման վարձը, կեցության ծախսերը, առողջական ապահովագրությունը եւ ուսումնական նյութերը, որոնք անհրաժեշտ են ուսումնառության ընթացքում. «Հաշվարկելով այդ ամբողջ ծախսերը՝ հաստատվում է տարեկան ընդհանուր ծախսերը ուսանողի, որն անհրաժեշտ է 1 տարի ուսանելու տվյալ երկրում, եւ շնորհում ենք այս ծախսերի մինչեւ 50 տոկոսը։ Ինչու մինչեւ 50 տոկոս, քանի որ կարող է լինել նաեւ 40 կամ 30 տոկոս, որը կախված է մասնագիտությունից, համալսարանից, ակադեմիական աստիճանից եւ հարցազրույցի արդյունքներից»։
Արմեն Ներսեսյանն ասաց, որ ամենաբարձր կրթաթոշակը, որ իրենք այս տարի շնորհել են եղել է 20 հազար ԱՄՆ դոլար. «Այս տարի մենք ունեցանք 90 դիմորդ, որոնցից ընտրվեցին 54-ը։ Նրանց կթաթոշակի բյուջեն կազմեց 840 հազար ԱՄՆ դոլար։ Համեմատելով նախորդ տարվա հետ մենք ունեցել ենք 27 կրթաթոշակ, որի բյուջեն կազմում էր շուրջ 571 հազար ԱՄՆ դոլար»։