«Գրքի և հրատարակչական գործի կենտրոն» ՊՈԱԿ-ում կատարված հափշտակության փաստի առթիվ քրգործ է հարուցվել
Պետական շահերի պաշտպանության հայց հարուցելու գործառույթի շրջանակներում ՀՀ գլխավոր դատախազության պետական շահերի պաշտպանության վարչությունում ուսումնասիրության առարկա են դարձել ՀՀ ֆինանսների նախարարության ֆինանսաբյուջետային վերահսկողության տեսչության կողմից ՀՀ կրթության, գիտության, մշակույթի և սպորտի նախարարության «Գրքի և հրատարակչական գործի կենտրոն» ՊՈԱԿ-ում իրականացված ստուգումների՝ ՀՀ գլխավոր դատախազություն ուղարկված արդյունքները:
Դատախազությունից հայտնում են, որ այդ նպատակով համապատասխան փաստաթղթեր են պահանջվել եւ ստացվել նաեւ ՀՀ կրթության, գիտության, մշակույթի եւ սպորտի նախարարությունից:
Ուսումնասիրությամբ պարզվել է, որ ՀՀ մշակույթի նախարարության եւ ՊՈԱԿ-ի, ինչպես նաեւ «Հայաստան» համահայկական հիմնադրամի եւ ՊՈԱԿ-ի միջեւ 2014-2017թթ. կնքված տարբեր պայմանագրերի կատարման արդյունքներով ՊՈԱԿ-ի կողմից ընդհանուր 1.182.200 ՀՀ դրամ գումար ենթակա է եղել վերականգնման ՀՀ պետական բյուջե: Ըստ նախնական տվյալների՝ կատարված ստուգման ընթացքում՝ 2017թ. ապրիլ-հուլիս ամիսներին եւ դրանից հետո, նշված գումարները վերադարձվել են կազմակերպության դրամարկղ, սակայն չեն մուտքագրվել եւ փաստացի չեն վերադարձվել ՀՀ պետական բյուջե: Բացի այդ, պարզվել է նաեւ, որ 2014-2017թթ. առանց հիմնավորող փաստաթղթերի, որպես գործուղման, աշխատավարձի, արձակուրդի, գույքի վարձակալության եւ տրանսպորտային ծախսերի հատուցման գումար, վճարվել է 1.457.200 ՀՀ դրամ:
Այսինքն ՀՀ կրթության, գիտության, մշակույթի եւ սպորտի նախարարություն «Գրքի եւ հրատարակչական գործի կենտրոն» ՊՈԱԿ-ի պաշտոնատար անձինք, օգտագործելով իրենց պաշտոնեական դիրքը, առերեւույթ յուրացրել են 2.639.400 ՀՀ դրամի չափով իրենց վստահված ՀՀ պետական բյուջեի միջոցները:
Նկատի ունենալով, որ արձանագրված խախտումներն առերեւույթ պարունակում են պաշտոնատար անձանց կողմից պաշտոնեական դիրքի օգտագործմամբ իրենց վստահված պետական միջոցներից խոշոր չափերով հափշտակություն կատարելու հանցագործության հատկանիշներ՝ ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ՝ ՀՀ քրեական օրենսգրքի 179-րդ հոդվածի 2-րդ մասի 1-ին եւ 3-րդ կետերով: