Կաթվածից հետո հիվանդն ամեն ինչ այլ կերպ է տեսնում
Կաթված տարած պացիենտները սկսում են աշխարհն այնպես չընկալել, ինչպես մենք ենք: Կարող է փոխվել հոտառությունը, համային զգացողությունները, տեսողական ընկալումը: Դրա օրինակն է վերջերս Neurocase ամսագրում նկարագրված դեպքը:
Նիդեռլանդների 64-ամյա բնակիչը հիվանդանոց է դիմել ձախ ձեռքի թուլության գանգատներով: Նա պարզաբանել է, որ դրանից 11 օր առաջ տեսողության ժամանակավոր կորուստ է ունեցել: Համակարգչային տոմոգրաֆիայով պարզվել է, որ պացիենտը որոշ ժամանակ առաջ կաթված է տարել, որն առնչվել է տեսողական տեղեկությունների մշակման համար պատասխանատու ուղեղի հատվածին: Դրանից հետո նա ամեն ինչ տեսել է մանրաչափ՝ նրան թվում էր, որ շրջապատող բոլոր առարկաները շատ ավելի փոքր են, քան իրականում կան:
Այսպես՝ նա բժիշկներին հավաստիացնում էր, որ հագուստն իր համար փոքր է. նա սովորաբար հագնում էր М չափսի իրեր, սակայն կաթվածից հետո սկսեց ձեռք բերել XL, որը նրա համար սարսափելի մեծ էր:
Բժիշկները տղամարդու մոտ ախտորոշել են սուր ձեւի միկրոպսիա: Սա խանգարում է, որի դեպքում բոլոր առարկաները զգալիորեն փոքր են թվում, քան իրականում: Հետազոտությունը ցույց է տվել, որ ավելի շատ վնասվել էր ձախ կողմի տեսողության հատվածը. երկու միանման իրեր համեմատելիս այն իրը, որը ձախ կողմում էր, պացիենտին ավելի փոքր էր թվում:
Բժիշկների կարծիքով՝ գլխուղեղում այսպիսի փոփոխություններ են առաջացել՝ կաթվածի հետեւանքները հաղթահարելու համար: