Մինչև 2100 թվականը Երկրի վրա ջերմաստիճանը կբարձրանա 0,9-2,3°С-ով

Նույնիսկ եթե բոլորովին դադարեցնել ածխաթթու գազի արտանետումը մթնոլորտ, ապա մինչեւ 2100 թվականը Երկրի վրա ջերմաստիճանը կբարձրանա 0,9-2,3°С-ով։ Իսկ եթե արտանետումների նվազեցման ջանքերը հաջողությամբ չպսակվեն, ապա տաքացումը կարող է հասնել 5,4°С-ի։ Այս մասին ասվում է ՄԱԿ-ի եւ ՕՀԿ-ի Կլիմայի փոփոխության միջկառավարական խմբի փորձագետների զեկույցում, հայտնում է Euronews-ը։

Իրադարձությունների փափուկ զարգացման տարբերակի դեպքում սպասվում է մաքուր ջրի դեֆիցիտի աճ, ոչ մեծ սառցակտորների անհետացում, մարջանի խութերի լայնածավալ քայքայում։

Զեկույցում նշվում է կլիմայական փոփոխությունների հիմնական նշանները՝

- ջերմաստիճանի բարձրացում,

- օվկիանոսի հետագա օքսիդացում եւ շերտավորում,

- Երկրի մթնոլորտում թթվածնի պարունակության նվազում,

- տաք հոսքերի դանդաղում,

- Խաղաղ օվկիանոսում ջրի մակերեւութային շերտի ջերմաստիճանի տատանման ցիկլերի սրացում, որը հայտնի է Էլ Նինյո եւ Լա Նինյո անվանումներով։

Օվկիանոսի տաքացման եւ սառցակտորների հալվելու հետ կապված ծովի մակարդակի բարձրացումը եւ արեւադարձային մրրիկները կհանգեցնեն հումանիտար եւ տնտեսական աղետների։ Նյու Յորքում ՄԱԿ ԳԱ նիստում կլիմայի փոփոխության հանդեպ առավել խոցելի երկրները, ինչպես օրինակ՝ Մալդիվները, ահազանգ են հնչեցնում։

Որպես կլիմայական փոփոխությունների դեմ պայքարի միջոց, զեկույցի հեղինակներն առաջարկում են՝

- լայնորեն օգտագործել էներգիայի վերականգնվող աղբյուրները,

- զարգացնել բնության պահպանվող գոտիների ցանցը,

- բարձրացնել օվկիանոսների կենսաբազմազանությունը՝ մարջանների արհեստական կմախքների աճեցմամբ եւ տնկարկումով, տեսակները այլ վայրերում վերաբնակեցնելով,

- նվազեցնել շրջակա միջավայրի աղտոտվածության եւ СО2-ի արտանետումները։

Մի շարք գիտնականների կարծիքով, ջերմոցային գազերի արտանետումով մարդկությունը խթանում է գլոբալ տաքացման տեմպերի արագացումը։ Առանց այդ ազդեցության այն կարող էր չգերազանցել 1-1,5°С-ը, ինչը մարդկանց կատարվող գործընթացներին հարմարվելու ժամանակ կտար։