Չեմ կարծում, թե կառավարությունը Ամուլսարի շահագործման մասով արդեն ունի որոշում. Մհեր Գրիգորյան
Չեմ կարծում, որ իրականությանը համապատասխանում է պնդումը, թե կառավարությունը Ամուլսարի շահագործման մասով արդեն ունի որոշում: Այս մասին NEWS.am-ի հետ զրույցում նշել է ՀՀ փոխվարչապետ Մհեր Գրիգորյանը:
«Բայց ես բազմիցս նշել եմ, որ Ամուլսարի հետ կապված որոշում կայացնելիս պետք է հաշվի առնել թե բնապահպանական բաղադրիչը, որը շատ կարեւոր է, թե իրավական, որը նույնպես կարեւոր է, թե տնտեսականը: Հիմա փորձագետներն աշխատում են, մի քիչ սպասենք տեսնենք: Այդ երեքի համակցության պարագայում, կարծում եմ՝ ճիշտ որոշում կկայացվի»,-ասաց նա:
Հարցին, թե տնտեսական առումով ինչ կտա Ամուլսարի հանքի շահագործումը Հայաստանին, ինչ կշահի մեր երկիրը, նա պատասխանեց. «Բնականաբար կան որոշակի դրական տնտեսական էֆեկտներ, չեն կարող չլինել, բայց նորից եմ ասում, միայն տնտեսական մասը նայել եւ դրա հիման վրա որոշում կայացնելը բավարար չէ»:
Մհեր Գրիգորյանը հստակ պատասխան չտվեց հարցին, թե արդյոք ինքը կողմ է Ամուլսարի հանքի շահագործմանը. «Ես այդ հարցին կպատասխանեմ այն ժամանակ, երբ երեք փորձագիտական եզրահանգումներին ծանոթանամ: Այդ ժամանակ պարզ կլինի: Այս պահին դեռ չեմ կարող ասել: Բայց վստահ կարող եմ ասել, որ լուծումը պետք է ունենա իրավական հիմքեր եւ չհակասի օրենսդրությանը»:
Հարցին, թե ինչու են նվազել ներդրումները, այն դեպքում, երբ ակնկալիքներ կային, որ հեղափոխությունից հետո ներդրումների հոսք է լինելու, Մհեր Գրիգորյանը պատասխանեց. «Որ տվյալներից ելնելով եք ասում, որ ներդրումները նվազում են, կամ ինչու եք համարում, որ նվազում են: Ես կարծում եմ՝ բնականոն ընթացք է»:
Ինչ վերաբերում է նրան, թե արդյոք այս պահին մեծ ներդրումային ծրագրեր կա՞ն, նա արձագանքեց. «Կարող է մեր պատկերացումները հսկայականության մասին տարբեր լինեն, բայց այստեղ իհարկե, ավելի կարեւոր է, թե ինչ միջավայր ենք ձեւավորում եւ առաջարկում ներդրողներին: Ավելին ասեմ, եկեք չթերագնահատենք նաեւ տեղացիների ներդրումները: Մենք սովոր ենք միշտ խոսել արտաքին ներդրումների մասին, բայց չպետք է մոռանանք եւ պետք է ուշադիր լինենք նաեւ ներքին ներդրումների նկատմամբ»:
Մհեր Գրիգորյանը խոսել է նաև ՌԴ նախագահի՝ Հայաստան այցելության մասին: Ըստ նրա՝ իհարկե, միանշանակ Պուտինը գալու է Հայաստան:
Հարցին, թե արդյոք նախատեսվում է երկկողմ հանդիպում ՀՀ վարչապետ Նիկոլ Փաշինյանի հետ, փոխվարչապետը պատասխանեց. «Վստահ եմ, որ կլինի երկկողմ հանդիպում, բայց դրա տևողության մասինոչինչ ասել չեմ կարող»: