Քոչարյանի խորտակված հույսը

Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժել է երկրորդ նախագահ Ռոբերտ Քոչարյանի փաստաբանական թիմի միջնորդությունը նրա նկատմամբ գրավ կիրառելու վերաբերյալ: Այսպիսով՝ Ռոբերտ Քոչարյանը կմնա կալանքի տակ:

Անկեղծ լինենք՝ այս որոշումը միանգամայն կանխատեսելի էր, որովհետև մի քանի օր առաջ նույն դատավորն արդեն մերժել էր Քոչարյանի խափանման միջոցը փոխելու միջնորդությունը, ու խիստ անհավանական կլիներ դիրքորոշման արմատական փոփոխությունը հաշված օրերի ընթացքում։

Դատական համակարգն աստիճանաբար ադապտացվում է նոր իրողություններին ու նույնիսկ այն պարագայում, երբ վեթինգ չի իրականացվել, կամ անցումային արդարադատության գործիքակազմը չի ներդրվել։ Դատական համակարգն, ըստ էության, մնացել էր նախկին համակարգի ռեստավրացիայի վերջին միջոցը, սակայն հիմա Ռոբերտ Քոչարյանը ու նրա թիմն իրենց հույսը չեն կարող դնել անգամ Հրայր Թովմասյանի ՍԴ-ի վրա, որովհետև նույնիսկ Բարձր դատարանի կայացրած վիճահարույց որոշումը, միանշանակ, լուծումեր չտվեց, այսպես ասած, Քոչարյանի գործին ու իրավիճակն ավելի խճճեց։

Մյուս կողմից երկրում տեղի են ունենում իրադարձություններ, որոնք ի դերև են անում հին համակարգի ռեստավրացիայի բոլոր հնարավորությունները։ Խոսքը, առաջին հերթին, այն մասին է, որ ԱԱԾ-ն ու ոստիկանությունը վերջնականապես ազատվում են հին համակարգի անգամ անուղղակի ազդեցությունից։

Նման իրավիճակում գրեթե 100 տոկոսով կանխատեսելի է, որ նախկին համակարգի ապամոնտաժման ու նրան իրավա-քաղաքական գնահատական տալու գործընթացներն ավելի կակտիվանան, իսկ այս համատեքստում Ռոբերտ Քոչարյանը կարող է միայն երազել ազատության մեջ հայտնվելու, առավել ևս՝ արդարացվելու մասին։

Ռոբերտ Քոչարյանի փաստաբանական թիմը սեպտեմբերի 19-ին վերաքննիչ բողոք է ներկայացրել առաջին ատյանի դատարանի՝ Քոչարյանին կալանավորելու որոշման դեմ, սակայն բոլորն են հասկանում, որ սա ավելի շատ ֆորմալ բնույթ ունի ու հազիվ թե ազդի այսօրվա ստատուս-քվոյի վրա։

Մյուս կողմից՝ Քոչարյանի պաշտպանական թիմն այսօր ինքնաբացարկի միջնորդություն ներկայացրեց դատավորին՝ դա ուղեկցելով վերջինիս հանդեպ անվայելուչ հայտարարություններով։ Բայց անգամ այս պարագայում դժվար է անկողմնակալության մեջ դատավորին մեղադրելը, որովհետև նա, օրինակ, արտերկիր մեկնելու հնարավորություն ընձեռեց Սեյրան Օհանյանին՝ բուժման կուրս անցնելու նպատակով, ընդ որում՝ Աննա Դանիբեկյանն այս որոշումը կայացրեց առանց խորհրդակցական սենյակ մտնելու։

Երկրորդ նախագահն օրեր առաջ դատարանում հայտարարել էր՝ ինքը որևէ տեղ փախչող չէ․ «Դատախազության աշխատողների համար դժվար է սա հասկանալը, ընդհանրապես, բայց այն տեսակի մարդը չեմ, որ կարող է ինչ-որ բանից փախնի։ Հասկանում եմ, որ իրոք դժվար է իրենց համար սա պատկերացնել և շատ-շատերի համար, եթե փախնողը լինեի, այսօր Ստեփանակերտում ադրբեջանցիք թեյ խմելուց կլինեին»։

Դատարանը նրան փաստորեն չհավատաց, իսկ Սեյրան Օհանյանը կարող է նույնիսկ երկրից ժամանակավորապես բացակայել։ Սա ավելի ընդգծված, որոշակի է դարձնում Ռոբերտ Քոչարյանի երկարատև կալանքի հեռանակարը՝ արձանագրելով նրա օտարումն անգամ յուրայիններից։

Նյութի սկզբնաղբյուրը՝ 1in.am