Ջերմուկից, Գնդեվազից և Կեչուտից Ամուլսարի շահագործման դեմ հանդես եկող քաղաքացիները երթ են անում (Տեսանյութ և լուսանկարներ)
Ջերմուկ քաղաքից, Գնդեվազ եւ Կեչուտ համայնքներից Ամուլսարի շահագործման դեմ հանդես եկող բնակիչները, դասադուլ հայտարարած դպրոցականները, ինչպես նաեւ գործադուլ հայտարարած քաղաքացիներ, Ջերմուկում գործող առողջարանների ու հյուրանոցների աշխատակիցները քայլերթով հասել են Ջերմուկի զոհված ազատամարտիկներին նվիրված հուշարձան՝ այնտեղ հանրահավաք անցկացնելու համար։ Մի խումբ քաղաքացիներ էլ ավտոերթ են իրականացրել։ Բնակիչների խոսքով՝ այսօրվանից սկսում են խաղաղ անհնազանդության ակցիաներ՝ այդպիսով պայքարելով Ամուլսարի շահագործման դեմ։
Հիշեցնենք, որ Ամուլսարի պաշտպանները սեպտեմբերի 20-ը հռչակել են բնապահպանական մոբիլիզացիայի և արդարության օր։ Հենց սեպտեմբերի 20-ին են Ջերմուկի բնակիչները և Ամուլսարի պաշտպանները նշանակել երկրի կառավարության համար այն վերջնաժամկետը, երբ որոշում պետք է կայացվի Ամուլսարի մասին։
Նշենք, որ այսօր մի շարք միջոցառումներ են նախատեսվում բոլոր նրանց կողմից, ովքեր դեմ են հանդես գալիս Ամուլսարի շահագործմանը։ Միջոցառումների թվում հեծանվաերթ՝ «Ամուլսարը մնալու է սար՝ հենց Քո՛ շնորհիվ, Քայլ արա՝ հեծանիվ քշիր» կարգախոսով, մոտոերթ՝ ընդդեմ Ամուլսարի հանքի շահագործման, Մանկասայլակներով երթ, Ամուլսարի պաշտպանները ֆլեշմոբեր են իրականացնում՝ փակցնելով «ԱմուՐսար», Save Amwulsar գրառմամբ պաստառներ։
Երևանում Հայկական բնապահպանական ճակատը բնապահպանական մոբիլիզացիայի օրվա մեկնարկը տալու է Մաշտոցի պուրակից, ժամը 13։00-ին։
Ժամը 18։30-ին Երևանում միջոցառումներ անկացացնող բոլոր խմբերը կմիանան Օպերայի մոտ, Արամ Խաչատրյանի արձանի շրջակայքում, որտեղից կսկսվի երթը։
Հիշեցնենք նաև, ավելի վաղ Operativ լրատվականը հաղորդել էր, որ այսօր Ջերմուկում և Գնդեվազում դասադուլ և գործադուլ էր։
Գնդեվազցի դպրոցականները նշում էին՝ չեն դադարեցնելու դասադուլը մինչև Ամուլսարի հարցը չլուծվի :