«Ես մարդ եմ և խնդրում եմ հարգեք իմ իրավունքը». Ցմահ դատապարտյալը այլևս չի դիմանում

« Ես Արտյոմ Սաֆարյանն եմ՝ ցմահ դատապարտյալ, ով արդեն հուսահատ է: Հայաստանում գոյություն ունեցող բոլոր իրավասու մարմիններին նամակներ եմ հղել: Ես ցանկանում եմ օգտվել իմ իրավունքից, որը օրենքով սահմանված է»,-Arlur.am-ի հետ հեռախոսազրույցում ասաց արդեն 14 տարի պատիժը կրող ցմահ դատապարտյալը:

Արտյոմ Սաֆարյանը պատիժը կրում է «Արմավիր» ՔԿՀ-ում: Մինչդեռ նրա սոցիալապես անապահով ծնողներն ու կինը բնակվում են Վանաձորում: Արտյոմը չի կարողանում օգտվել օրնքով սահմանված տեսակցություններից, քանի որ ծնողները հնարավորություն չունեն «Արմավիր» ՔԿՀ այցելելու: Արտյոմի ծնողները թոշակառու են և բազմաթիվ առողջական խնդիրներ ունեն: Ցմահ դատապարտյալը դիմել է իրավասու մարմիններին և խնդրել, որ իրեն տեղափոխեն «Վանաձոր» ՔԿՀ: «Այնտեղ էլ կա փակ ռեժիմ, ինչը սահմանված է ինձ համար: Սկզբում ինձ մերժում էին՝ պատճառաբանելով, որ «Վանաձոր» ՔԿՀ-ում ցմահ դատապարտյալներ չկան: Հետո, երբ խնդրեցի, որ պատճառաբանությունը հիմնավորեն՝ ասեցին, որ համապատասխան պայմաններ չկան: Հետո դիմեցի Մարդու իրավունքների պաշտպանին, արձանագրվեց, որ կոպտորեն խախտվել են ին իրավունքները և պարտավոր են ինձ համար ՔԿՀ-ում պայմաններ ստեղծել: Այս անգամ անհեթե մեկ այլ պատճառ բերեցին, թե ես «Վանաձոր» ՔԿՀ-ում և քաղաքում թշնամիներ ունեմ: Սա ծիծաղելի է, ո՞վ պետք է վնասին ինձ փակ պայմաններում: Թող հիմնավորեն, թե ովքե՞ր են իմ թշնամիները»,-նշեց ցմահ դատապարտյալը:

Արտյոմ Սաֆարյանը միայն մի բան է ցանկանում՝կարողանալ տեսակցել հարազատների հետ: Նա նշում է, որ վերջին անգամ մոր և եղբոր հետ է տեսակցել: Դա 2017 թվականին է եղել: Նշենք, որ Արտյոմ Սաֆարյանը ազատազրկման է դատապարտվել 2005 թվականին։ Մինչև 2016 թվականի ապրիլը պատիժը կրել է «Նուբարաշեն» ՔԿՀ-ում, այնուհետև նրան տեղափոխել են «Արմավիր» քրեակատարողական հիմնարկ:

ՀՀ Արմավիրի մարզի ընդհանուր իրավասության առաջին ատյանի դատարանը այս տարվա փետրվարին մերժել է Արտյոմի՝ «Վանաձոր» ՔԿՀ տեղափոխվելու մասին դիմումը, սկզբնական պատճառաբանությունը եղել է Վանաձորում ցմահ դատապարտյալների համար նախատեսված պայմանների բացակայությունը իսկ հետո՝ «Վանաձոր» ՔԿՀ-ում Արտյոմի հանդեպ առկա թշնամանքը, որը ինքը՝ Արտյոմ Սաֆարյանը, անհիմն է համարում։ Արտյոմ Սաֆարյանը շարունակ կրկնում էր, որ ինքը մարդ է, սակայն իր նամակներին ոչ ոք ուշադրություն չի դարձնում: Արտյոմը նշում է, որ իրեն սկզբում 15 տարվա ազատազրկման են դատապարտել,՝ սպանության համար, բողոքարկման արդյունքում պատժաչափը փոխել են:

«Դատավորը ցանկանում էր 13 տարի պատժաչափ տալ, բայց տուժող կողմը կտրուկ չհամաձայնեց դրան և ինձ դատապարտեցին 15 տարվա ազատազրկման: Բակային կռվի ժամանակ երիտասարդ եմ դանակահարել ու կարծում եմ ցմահ դատապարտումը իմ պարագայում սարսափելի պատիժ է: Նույնիսկ դանակի վրայի մատնահետքը չէր համապատասխանում իմին» ,-մանրամասնեց Արտյոմը։

Արտյոմ Սաֆարյանը հույս ունի, որ առաջիկայում իր գործը կվերաբացվի, բայց մինչ այդ նա ցանկանում է, որ օրենսդրորեն իր իրավունքը պաշտպանվի և ինքը կարողանա հանդիպել հարազատներին: «Կինս 7 բանկի տոկոս է մուծում, ոչ մի կերպ չի կարող գալ ինձ այցելության: Ես չեմ դիմանում արդեն ստեղծված իրավիճակին: Ես խնդրում եմ պատկան մարմիններին՝ մի անտեսեք իմ խնդիրը»,-եզրափակեց Արտյոմ Սաֆարյանը:

Լուսին Ղազարյան

Նյութի աղբյուրը՝ Arlur.am