Այնքան մեծ էր այդ ցանկը, որ մտածեցի՝ իմ անունն էլ կարող եմ գտնել այնտեղ. Մակունցը՝ հնարավոր հրաժարականների մասին

Այնքան մեծ էր այդ ցանկը, որ մտածեցի՝ իմ անունն էլ կարող է գտնեմ: Այս մասին, այսօր՝ սեպտեմբերի 19-ին, ԱԺ-ում լրագրողների հետ զրույցում նշեց «Իմ քայլը» խմբակցության ղեկավար Լիլիթ Մակունցը՝ անդրադառնալով այսօր մամուլում հրապարակված այն պաշտոնյաների ցանկին, որոնց հրաժարականը սպասվում է առաջիկա օրերին:

«Ես նույնպես ծանոթացել եմ այդ ցանկին, որ հրապարակվել էր մամուլում: Անկեղծ ասած, այնքան մեծ էր այդ ցուցակը, որ նույնիսկ մտածում էի՝ իմ անունն էլ այնտեղ կգտնեմ: Կատակը մի կողմ, իհարկե, որևէ բան չի քննարկվել վարչության նիստի ժամանակ: Ինքս չունեմ որևէ տեղեկատվություն, որ ինչ-որ մեկը հրաժարական է ներկայացնելու, մասնավորապես, գործադիրից:

Ինչ վերաբերում է «Իմ քայլը» խմբակցությանը, ապա մեզ մոտ նման զարգացումներ չեն սպասվում»,-հայտարարեց Մակունցը:

«Իմ քայլը» խմբակցությունն ուժեղ է ավելի քան երբևէ: Մենք դեռ շատ անելիքներ ունենք բարեփոխումների, ռեֆորմների հետ կապված, այդ թվում դատաիրավական: Մենք բոլոր մեր ջանքերն ուղղում ենք այն ռազմավարությունն իրականացնելուն, որը դատաիրավական բարեփոխումների համատեքստում ներկայացվել է արդարադատության նախարարության կողմից»,- ընդգծեց նա:

Ինչ վերաբերում է Սահմանադրական դատարանի նախագահի շուրջ լուրերին, նախօրեին «Իմ քայլը» խմբակցությունը նախագիծ է ներկայացրել Ազգային ժողովին՝ ներկայացնելով իրավական հիմքեր այն մասին, որ, այո՛, սկսում ենք գործընթաց ՍԴ դատավորներից մեկի լիազորությունները դադարեցնելու առնչությամբ, նշեց «Իմ քայլը» խմբակցության ղեկավարը:

Նա ընդգծեց, որ իրավական հիմքերը կցվել են այդ փաստաթղթին. «Այդ հիմքերին կցվել է նաեւ «Իմ քայլը» խմբակցության որոշումը և այն ուղղվել է ԱԺ նախագահի գրասենյակ: ԱԺ նախագահն արդեն այն մակագրել է ԱԺ պետաիրավական հանձնաժողով, որն էլ կքննարկի փաթեթը: Իրավական հիմքերն արդեն հրապարակվել են և տեղադրված են ԱԺ կայքում»:

Մակունցը նշեց, որ ԱԺ մյուս 2 խմբակցությունները կծանոթանան նախագծին և կձևավորեն դիրքորոշում:

Դիտարկմանը, թե որտեղի՞ց այդ վստահությունը, որ ՍԴ-ն արդար, անաչառ մոտեցում կցուցաբերի այն դեպքում, երբ խոսքը ՍԴ նախագահի մասին է, Մակունցը պատասխանեց. «Իհարկե, ՍԴ-ն պետք է ի վերջո որոշում կայացնի, իսկ ՍԴ-ն ապաքաղաքական մարմին է: Մեր կարծիքով, այն իրավական հիմքերը, որոնք ներկայացրել են մեր իրավաբանները, չափազանց ծանրակշիռ են: Մենք վստահ ենք, որ ՍԴ-ն առաջնորդվելու է բացառապես իրավական հիմքերը դիտարկելով: Իրավական հիմքեր մենք այս պահին ունենք միայն տվյալ դատավորի հետ կապված, դրա համար նպատակահարմարությունը, որ ներկայացվեց հիմա, այն էր, որ իրավական հիմքերը ամբողջացվել են հիմա: Մնացածը ՍԴ-ն է որոշում, թե արդյոք այդ հիմքերը նաև իրենց դիտարկմամբ ծանրակշիռ են: Ընթացք տվող-չտվողը իրենք են»:

«Իմ քայլի» ղեկավարը հավելեց, որ այս պահին ընդհանրապես չեն մտնում ՍԴ անդամ-դատավոր բանավեճի մեջ:

Ինչ վերաբերում է մյուս երկու խմբակցությունների դիրքորոշմանը, Մակունցն ասաց. «Ես նախապես խոսել եմ ԲՀԿ խմբակցության քարտուղար Արման Աբովյանի և «Լուսավոր Հայաստան» խմբակցության ղեկավար Էդմոն Մարուքյանի հետ: Ես խնդրել եմ, որ իրենց դիրքորոշումը նախապես հայտնեն կամ քննարկում ունենանք այդ առումով: Բայց հարցը քննարկվելու է նաև պետաիրավական հանձնաժողովում»:

Հարցին, թե իշխող ուժը քննարկե՞լ է հարցը, թե ով է փոխարինելու Հրայր Թովմասյանին, եթե հնարավոր լինի դադարեցնել նրա լիազորությունները, մակունցը նկատեց. «ՍԴ նախագահի հետ կապված օրենսդիրը չունի որոշելու լիազորություն:

Որպեսզի նախագիծը դառնա ՍԴ քննարկման առարկա, անհրաժեշտ է ԱԺ պատգամավորների 3/5-ը: Այո, «Իմ քայլը» ունի դա, բայց մեզ համար չափազանց կարևոր է, որ մենք իմանանք մյուս խմբակցությունների դիրքորոշումը իրավական հիմնավորումների հետ կապված: Իհարկե, շատ ցանկալի կլինի, որ ՍԴ-ի հանդեպ վստահությունը վերականգնելու համար ջանք գործադրեն նաև մյուս խմբակցությունները»: