Անհայտ անձինք Կիևի մոտ հրդեհել են Ուկրաինայի Ազգային բանկի նախկին տնօրենի տունը
Անհայտ անձինք Կիեւի մոտ հրդեհել են Ուկրաինայի Ազգային բանկի նախկին տնօրեն Վալերիա Գոնտարեւայի տունը։ Այս մասին նա երեքշաբթի տեղեկացրել է ուկրաինական «Նովոյե վրեմյա» պարբերականին։
Գոնտարեւայի խոսքով՝ Գորենիչի ավանում գտնվող տուն նետել են բռնկվող խառնուրդով շիշ, ինչի հետեւանքով նրա տունն այրվել է ամբողջովին, այն չեն կարողացել մարել անգամ հրշեջները։
Օգոստոսի վերջին Լոնդոնում, որտեղ այժմ ապրում է Գոնտարեւան, հետիոտների անցումի վրա նրան հարվածել է մի մեքենա։ Նա հիվանդանոց է ընկել, իսկ ոստիկանությունը պարզում է՝ արդյոք դա միտումնավոր էր, թե՞ դժբախտ պատահար։ Սեպտեմբերի 5-ի գիշերը անհայտ անձինք բենզին են լցրել եւ այրել նրա հարսի մեքենան։
Օգոստոսի 27-ին Կիեւի Պեչորյան շրջանային դատարանը թույլ էր տվել Ուկրաինայի Հետաքննությունների պետական բյուրոյին ուժով Գոնտարեւային բերել հարցաքննության Ազգային բանկի վարչության անդամների ծառայողական դիրքի չարաշահման գործով։