Բոլթոնի հրաժարականը սպասելի էր, բայց չեմ կարծում, թե ազդեցություն կունենա Հայաստանի վրա. Սուրեն Սարգսյան (Տեսանյութ)
ԱՄՆ նախագահի անվտանգության հարցերով արդեն նախկին խորհրդական Ջոն Բոլթոնը ԱՄՆ նախագահ Դոնալդ Թրամփի աշխատակազմի ամենաագրեսիվ եւ ամենակոշտ դիրքորոշում ունեցող գործիչներից մեկն էր: Այս մասին, այսօր՝ սեպտեմբերի 13-ին, լրագրողների հետ հանդիպման ժամանակ նշեց քաղաքագետ Սուրեն Սարգսյանը՝ անդրադառնալով Բոլթոնին հեռացնելու Թրամփի որոշմանը:
Նրա խոսքով, բացի դրանից Բոլթոնն ուներ իր անձնական քաղաքական գիծը, քաղաքական պատկերացումները, այդ թվում արտաքին քաղաքականության մեջ, ու դրանք շատ հաճախ չէին համընկնում ԱՄՆ նախագահի դիրքորոշումների հետ:
«Թրամփը հաճախ նրան կշտամբում էր՝ ասելով, որ եթե քեզնով լինի, բոլորին կռմբակոծես, բոլոր երկրների դեմ պատերազմ կհրահրես: Սա ԱՄՆ նախագահի համար ընդունելի մոտեցում չէր: Դա պաշտոնանկության պատճառներից մեկն էր, կային շատ պատճառներ, այդ թվում ներքաղաքական գործընթացների հետ կապված: Նրա հարաբերությունները լավ չէին ոչ պետքարտուղարության հետ, ոչ անվտանգության ոլորտի այլ հիմնարկների հետ:
Մեծ հաշվով հրաժարականը սպասելի էր: Հավանաբար սպասելի էր ավելի ուշ ժամանակահատվածի համար, բայց այն տեղի ունեցավ այս պահին: Ամերիկյան մամուլում գրվում է, որ Թրամփն այս քայլին գնաց հենց հիմա, որովհետեւ ցանկանում է Իրանի նախագահի հետ բանակցություններ սկսել ՄԱԿ-ի գլխավոր ասամբլեայի շրջանակներում: Մեծ հաշվով, Բոլթոնը այն անձն էր, որ ներկայությունն այդ պաշտոնում խանգարում էր այդ բանակցություններին»,-հայտարարեց քաղաքագետը:
Նա հավելեց, որ չի կարծում, որ ամերիկյան արտաքին քաղաքականության փոփոխություն լինի, սակայն Բոլթոնի հեռացումով կոշտ դիրքորոշումը գոնե Իրանի հարցում կմեղմվի. Հավանաբար դիրքորոշումը կմեղմվի նաեւ Ռուսաստանի նկատմամբ: Թրամփն ընտրություններից առաջ ուզում է ներկայանալ որպես լավ բանակցող»:
Ինչ վերաբերում է ավանդական հայկական հարցին, արդյոք ինչ ազդեցություն այդ ամենը կունենա Հայաստանի վրա, բանախոսի կարծիքով, ոչ մի:
«Բոլթոնի այցը Հայաստան, մեծ հաշվով, ուսումնական էր, ուսումնասիրելու նպատակով էր եկել: ԱՄՆ-ը իր քաղաքականությունը չի փոխելու Հայաստանի եւ մեր տարածաշրջանի նկատմամբ:
Մի փոքր ավելի մեղմ կլինի Իրանի նկատմամբ, եթե ԱՄՆ-Իրան բանակցություններ սկսեն: Դա, իհարկե, Հայաստանի համար շատ օգտակար կլինի, որովհետև Իրանի հետ կկարողանանք ավելի խորը հարաբերություններ ունենանք, եթե այդ երկիրը դուրս գա սանկցիաների տակից: Նույնը վերաբերում է նաեւ Ռուսաստանին»,-հայտարարեց Սուրեն Սարգսյանը: