Սպառնում են ինձ սպանել. Սոնա Աղեկյան
Մեր թիմի բոլոր անդամները ենթարկվում են բռնաճնշումների, նույնիսկ իմ տան մոտ ոստիկանության օպերլիազորները հսկողություն են իրականացնում և այդ մասին զեկուցում համապատասխան անձանց: Այս մասին, այսօր՝ սեպտեմբերի 13-ին, լրագրողների հետ զրույցում նշեց «Այլընտրանքային քաղաքապետարան» նախաձեռնող թիմի ղեկավար Սոնա Աղեկյանը:
«Շենգավիթի վարչական շրջանի 26-ամյա ղեկավարը մասնակցում էր ինձ բերման ենթարկելու օպերացիային: Ինձ ապօրինաբար տարան ոստիկանության բաժին, 3 ժամից ավելի պահեցին, ես վերցրել եմ փաստաթղթերը, որ զեկուցագրում ամեն ինչ գրված է, այդ ամենը սուտ , և ես դիմելու ենք Եվրոպական դատարան»,- ասաց նա:
Աղեկյանը նաև տեղեկացրեց, որ իրեն դատի է տվել Երևանի քաղաքապետ Հայկ Մարությանը. «Հայկ Մարությանը պարզել է, որ ունի արժանապատվություն և դա, ըստ նրա, արժե 2 մլն դրամ: Նա շատ լավ գիտի, որ ես իմ խնամքի տակ ունեմ երկու անչափահաս երեխա, երկրորդ խմբի հաշմանդամություն ունեցող մայր, ինքը ֆինանսապես ցանկանում է ինձ ճնշել, որ լռեցնի, բայց չի կարող: Քանի որ շարժական և անշարժ գույք չունեմ, որի վրա հնարավոր լինի բռնագանձումը տարածել, երեկ հասկացա, որ Հարկադիր կատարման ծառայությունը պետք է գույքագրում կատարի՝ երեխաներիս ու մայրիկիս հագուստը գա, գնահատի, որպեսզի փոխհատուցեն Հայկ Մարությանի արժանապատվության երկու միլիոն դրամը»,- ասաց նա ու դիմեց Մարությանին. «Իմ զգեստներից մի քանիսը, որոնք համապատասխանեն ձեզ, ձեր չափսերին, ես դրանք առանձնացրել եմ: Իմ ներքնազգեստները, որ ժանյակավոր են հատուկ ձեզ համար, դուք սիրում եք այդպիսիք կրել, կարմիր շրթներկեր ունեմ: Դրանք բոլորը կներկայացնեմ ձեզ»:
Իր դեմ հարուցվել է շինծու քրեական գործ, որի նպատակը քաղաքապետարանի դեմ ակցիա անողներին լռեցնելն է, կարծում է Աղեկյանը, որը հիշեցրեց, որ երբ բողոքի ակցիա էին իրականացնում քաղաքապետարանի դիմաց, իրենցից 8-ին բերման են ենթարկել և անմիջապես հարուցվել է քրեական գործ, և սահմանափակված է իրենց տեղաշարժի իրավունքը:
Նրա խոսքով, քրգործի հիմքում այն է, որ իրենք աղբը լցնելով քաղաքապետարանի առջեւ, քաղաքապետարանի աշխատանքը 15 րոպեով խաթարվել է: Աղեկյանը հակադարձեց՝ ասելով, որ քաղաքապետարանն ունի 3 մուտք, կարող էին մյուս երկու մուտքերով աշխատել:
«Ակցիաներից մեկի ժամանակ քաղաքապետարանի կոմունալ վարչության պետ Արարատ Խաչիկյանի կողմից հնչեցվեցին հայհոյախառն արտահայտություններ, օգտագործելով բոլոր բառերը մինչեւ վերջ: Այդ ամենը ոստիկանությունը չնկատեց, որովհետեւ դա նրանց ձեռնտու չէր: Պետք չէր նկատել, որ պաշտոնատար անձը, որը անգործության համար բազմիցս պարեւավճարներ է ստացել, կարող է հայոհել ակցիայի խաղաղ մասնակիցներին:
Այն գարշահոտությունը, որ ես տարել էի, որ ինքն ու պարոն Մարությանը շնչեն, անմիջապես ագրեսիվություն դրսեւորեց եւ թափեց, որովհետեւ գարշահոտությանն ինքն էլ չդիմացավ եւ վնասեց ձեռքս: Պարզվեց, որ լուրջ մկանային խնդիրներ կան, բայց ոստիկանությունը որոշեց այդ գործը կարճել: Ես մինչեւ վերջ պայքարելու եմ, նույնիսկ անձնական վրեժ կլուծեմ»:
Սոնա Աղեկյանը հայտնեց, որ սպառնում են իրեն սպանել: «Ոստիկանության կենտրոնական բաժնում էի գտնվում եւ արդեն վերադառնում էի, որ նստեցի մեքենա, նկատեցի մի անձնավորության, ով հանդիսանում է Կենտրոնական ոստիկանության բաժանմունքի հետեւում գտնվող աղբակույտի բնակիչ, հանդիսանում է Երեւանի քաղաքապետարանի կոմունալ վարչության աշխատակից, այս անձը հեռախոսով մոտեցավ մեր մեքենային եւ սկսեց նկարել մեքենան` տարբեր ուղղություններից, նկարում էր ինձ: Ես լսեցի նրա հեռախոսազանգը, ինչը բառացի կրկնում եմ`«երկու կոպեկի հարց է ընդամենը, քաղաքապետարանի զիբիլը նկարողը բռիս մեջ է, անձամբ իմ ձեռքերով պատրաստ եմ սպանել, երկու կոպեկի հարցը լուծել»,-պատմեց նա:
Սոնա Աղեկյան ասաց, որ տեսաձայնագրել է, որ անձը չի հերքում՝ պատրաստ է սպանել իրեն երկու կոպեկի դիմաց:
Սոնա Աղեկյանը հավելեց, որ սկսում են Հայկ Մարությանին անվստահություն հայտնելու՝ իմփիչմենթի, գործընթաց: