Երբ այս տարվա մայիսին ԵՊՀ ռեկտոր Արամ Սիմոնյանը հրաժարական տվեց, իշխանությունները համալսարանի ռեկտորի պաշտոնակատար նշանակեցին իրենց դրածո Գեղամ Գևորգյանին

Երբ այս տարվա մայիսին Երևանի պետական համալսարանի ռեկտոր Արամ Սիմոնյանը հրաժարական տվեց, իշխանությունները համալսարանի ռեկտորի պաշտոնակատար նշանակեցին իրենց դրածո Գեղամ Գևորգյանին: Իրավական առումով համալսարանի ռեկտորը ընտրվում է հոգաբարձուների խորհրդի կողմից, բայց այդ ընտրությունը ձևական բնույթ է կրում, քանի որ իշխանության հրահանգով հոգաբարձուների խորհրդի իշխանական անդամները կողմ քվեարկեցին Գևորգյանի թեկնածությանը, իսկ համալսարանական անդամները՝ դեմ: Իսկ քանի որ իշխանության ներկայացուցիչները խորհրդում մեծամասնություն են կազմում, Գևորգյանը նշանակվեց ռեկտորի պաշտոնակատար: Դեկտեմբերին սպասվում է ռեկտորի ընտրությունների բեմականացում, և կասկած չկա, որ նույն ընթացակարգով իշխանությունը կանցկացնի իր թեկնածու Գևորգյանին:

Գեղամ Գևորգյանը, չսպասելով ռեկտոր ընտրվելուն, արդեն անցել է համալսարանը սեփական կադրերով համալրելու գործին՝ ազատվելով նախկին ռեկտոր Արամ Սիմոնյանի կադրերից: Բայց մինչև Գևորգյանի կադրային քաղաքականությանը անցնելը, ներկայացնենք, թե ով է Գեղամ Գևորգյանը և ինչով է աչքի ընկել մինչև իր ռեկտորական գործունեությանը անցնելը:

Նախ նշենք, որ Գեղամ Գևորգյանը ակադեմիկոս է: Նա այդ բարձր կոչմանը արժանացել է 2006-ին, այն բանից հետո, երբ իր փեսա, ռուսաստանաբնակ հայտնի մեծահարուստ, «Պրոմեթեյ» բանկի սեփականատեր Սենիկ Գևորգյանը Հայաստանի գիտությունների ազգային ակադեմիային նվիրեց 11 հատ ԳԱԶ 31-10 ավտոմեքենա: Այսինքն՝ Գևորգյանի ակադեմիկոսական տիտղոսը արժի ճիշտ այնքան, որքան 11 հատ ԳԱԶ 31-10 ավտոմեքենաների շուկայական արժեքը 2006-ին՝ մոտավորապես մի 100 հազար դոլար:

Գեղամ Գևորգյանը բավական հետաքրքիր ինդիվիդում է, քանի որ կարողանում է գիտամանկավարժական գործունեությունը համատեղել կոմերսանտության հետ, ինչը, համաձայնվեք, որ շատ քչերին է հաջողվում: Մասնավորապես, օրերս նա ընտրվեց «Էվոկա բանկի» բաժնետերերի խորհրդի նախագահի տեղակալ: «Էվոկա բանկը» նույն «Պրոմեթեյ» բանկն է, բայց, այսպես կոչված, ռեբրենդինգի ենթարկված: Ակադեմիկոս Գևորգյանը այդ բանկի խոշոր բաժնետերերից է: Ամենայն հավանականությամբ՝ նույն Սենիկ Գևորգյանի աջակցությամբ։ Նկատենք, որ Սենիկ Գևորգյանը Ռոբերտ Քոչարյանի մերձավոր շրջապատի գործարարներից է:

Գեղամ Գևորգյանը միայն «Էվոկա բանկ»-ով ու Սենիկ Գևորգյանով չէ, որ կապված է Ռոբերտ Քոչարյանի հետ: Ակադեմիկոս Գևորգյանը փայատեր է «Հյուր սերվիս» ընկերությունում: Հայտնի է, որ այդ ընկերության հիմնական սեփականատերը Սեդրակ Քոչարյանն է, այսինքն՝ Գևորգյանը Քոչարյանների բիզնես պարտնյորն է:

Լինելով փոխլրացման, այսպես կոչված, կոմպլիմենտարիզմի գծի համոզված ջատագով, Գևորգյանը համագործակցում է ոչ միայն ներկա իշխանության, այլ նաև Քոչարյանի ընտանիքի անդամների հետ: Գիտական օլիմպի գագաթին հասած ակադեմիկոս Գևորգյանը իրեն շրջապատել է նախկին նախագահ Սերժ Սարգսյանի ամենամերձավոր շրջապատի ներկայացուցիչներով: Նա պրոռեկտոր է նշանակել իր սանիկ Էլինա Ասրյանին, որը 2013-ին նախագահական ընտրությունների ժամանակ եղել է նախագահի թեկնածու Սերժ Սարգսյանի նախընտրական շտաբի PR պատասխանատուն:

Մյուսը պրոռեկտոր Արթուր Իսրայելյանն է, որը Սերժ Սարգսյանի իշխանության տարիներին ՀՀԿ-ի համար ձայներ հավաքագրելու ակտիվ կազմակերպիչներից էր՝ լինի դա նախագահական, խորհրդարանական, թե Երևանի քաղաքապետի ընտրություններ: Բայց Իսրայելյանը համատեղության կարգով նաև կրթության և գիտության նախարար Արայիկ Հարությունյանի համակուրսեցին է:

Մի խոսքով՝ հայ հայտնի գիտնական և ակադեմիկոս Գեղամ Գևորգյանը իր բազմաթիվ այլ բիզնեսների կողքին ձեռք է բերել մի բիզնես ևս՝ Երևանի պետական համալսարանի ռեկտորի պաշտոնը: Իրեն շրջապատել է նախկին ու ներկա իշխանությունների ներկայացուցիչներով ու զբաղվում է գիտակոմերցիոն գործունեությամբ, այսինքն՝ գիտության և կրթության անվան տակ փող շինելով:

Մի հետաքրքիր հանգամանք ևս: Այս տարվա մարտ ամսին Արամ Սիմոնյանը Գեղամ Գևորգյանին ազատել էր համալսարանի պրոռեկտորի պաշտոնից: Գևորգյանը դատական հայց էր ներկայացրել ընդդեմ համալսարանի ղեկավարության՝ պահանջել, որ իրեն վերականգնեն աշխատանքի և վճարեն այդ ժամանակահատվածի համար: Գևորգյանն արդեն մի քանի ամիս համալսարանի ռեկտորի պաշտոնակատարն է, սակայն դատական հայցը հետ չի վերցրել, այսինքն՝ շարունակում է պահանջել, որ իրեն վերականգնեն պրոռեկտորի պաշտոնում: Երևի մարդ առնվազն ակադեմիկոս պետք է լինի Գևորգյանի մտքի ճախրանքը ընկալելու համար: Բայց դա բոլորին հասու չէ, քանի որ ոչ բոլորը կարող են ակադեմիային 11 հատ ԳԱԶ 31-10 ավտոմեքենա նվեր անել։

Լուսանկարը՝ Armeniasputnik-ի

Նյութի աղբյուրը՝ 1in.am