71 հարկանի շենքը նոր շինարարական տեխնոլոգիա է, նոր մոտեցում է, նոր մտածողութուն. Արթուր Մեսչյան

71 հարկանի շենքը նոր շինարարական տեխնոլոգիա է, նոր մոտեցում է, նոր մտածողութուն է: Այս մասին, այսօր՝ սեպտեմբերի 10-ին, Երևանի ավագանու նիստի ժամանակ նշեց Երևանի գլխավոր ճարտարապետ Արթուր Մեսչյանը՝ պատասխանելով ավագանու անդամներից մեկի հարցին, թե մամուլում տեղեկատվություն է շրջանառվում Երևանում 71 հարկանի շենք կառուցելու մասին:

«Բայց ընդհանրապես, եթե Երեևանում լինի մեկ հատ 71 հարկանի շենք, ինչո՞ւ ոչ, հեռու մի տեղ, լանջի վրա թող լինի: Որովհետև 71 հարկանի շենքը նոր շինարարական տեխնոլոգիա է, նոր մոտեցում, նոր մտածողություն է»,-ասաց նա:

Արդյոք մենք ուզում ենք, որ Երևանի թաղամասերում, քաղաքի սրտում պահպանվեն ահռելի քանակի ավտոտնակներ, խայտառակ որակի բնակելի տներ և ինչ ճանապարհ կա այդ բակերը վերադարձնել քաղաքացիներին, հարցրեց Երևանի գլխավոր ճարտարապետ Արթուր Մեսչյանը:

Նա առաջարկեց այդ հարցի պատասխանի մի քանի տարբերակ. «Տարբերակ 1. երեւանցիներն ամեն մեկն իր ունեցած ավտոտնակը քանդում է եւ տարածք է ստեղծում իր երեխայի խաղալու համար: Քանի՞ երեւանցին կհրաժարվի իր ավտոտնակից: Կարծում եմ՝ մի 10 հոգի կգտնվի, ոչ ավելի:

Տարբերակ 2. գա կառուցապատող, որը հնարավորություն ունենա վերացնել բոլոր ավտոտնակները, կառուցի մի կառույց, տրամաբանական, չխախտի քաղաքաշինական նորմերը, ապահովի ավտոտնակների սեփականատերերին կանգառի տեղ իր կառուցած շենքում, բարեկարգի տարածքը եւ առաջին հարկում կազմակերպի մանկապարտեզ: Այդտպես է Թումանյան փողոցում:

Տարբերակ 3. Թույլ չտալ անել ընդհանրապես ոչ մի բան:

Ի վերջո, պետք է հասկանանք, թե ինչ ենք ուզում մեր քաղաքից, ինչ պայմաններ են ծանրացած մեզ վրա, ինչ ժառանգություն ենք ստացել: Ժառանգությունը միայն այն չէ, որ 18 հարկանի շենք կառուցելու թույլտվություն է տրվել, այլ այն, որ այլանդակ շինություններով օկուպացրել են քաղաքի թաղամասերը»,-հայտարարեց Մեսչյանը:

Նա կոչ արեց ավագանուն օգնել, որ այնպիսի օրենսդրական դաշտ ունենանք, որ հնարավոր լինի չեղարկել նախկինում տրված շինարարական թույլտվությունները. «Այստեղ մենք թույլ ենք, որովհետեւ մեզ դատի կտան եւ հաստատ կշահեն դատը: Քաղաքն այսօր պաշտպանված չէ»:

Քաղաքապետ Հայկ Մարությանն էլ հավելեց, որ իրենք փորձում են նման տարածքների սեփականատերերի հետ հայտարարի գալ, այլ տարածքներ առաջարկել, սակայն Երեւանում ազատ տարածքներ գրեթե չկան, բոլորը նախկին տարբեր մակարդակի պաշտոնյաների կողմից բաժան-բաժան է արվել: