Ադրբեջանի՝ ՀԱՊԿ անդամ դառնալը կարող է օգուտ լինել Հայաստանին. «Իմ քայլը» դաշինքի պատգամավոր Վիկտոր Ենգիբարյան
«Իմ քայլը» դաշինքի պատգամավոր Վիկտոր Ենգիբարյանը կարծում է, որ Ադրբեջանի՝ ՀԱՊԿ անդամ դառնալը կարող է օգուտ լինել Հայաստանին:
Նրա խոսքով՝ ՀԱՊԿ-ում վաղուց հասունացել է բարեփոխումներ նախաձեռնելու անհրաժեշտությունը։ Նա կոչ է արել խուճապի չմատնվել, որ Ադրբեջանը կարող է հիպոթետիկ հնարավորություն ստանալ՝ դառնալու կազմակերպության գործընկերը՝ ավելացնելով, որ այս հարցը պետք է դիտարկել նաև այլ տեսանկյունով։ «Գուցե, դա անգամ մեզ օգուտ կլինի։ Դուք այդ մասին չե՞ք մտածել»,- ասել է պատգամավորը։
Նա հիշեցրել է, որ Թուրքիան և Հունաստանը, չգտնվելով անվտանգության միասնական համակարգի ձևաչափում (ՆԱՏՕ- խմբ.), մշտապես պատերազմներ են վարել միմյանց միջև, և, խորհրդարանականի կարծիքով, եթե ՆԱՏՕ-ում գտնվելը չլիներ, նրանք կշարունակեին հակամարտել միմյանց հետ։ Ենգիբարյանն առաջարկել է ավելորդ լարվածություն չստեղծել հասարակությունում այս հարցի վերաբերյալ։ «Որովհետև երբ դա մեզ պետք լինի, հասարակությունն անմիջապես հանդես կգա այդ նախաձեռնության դեմ»,- ասել է պատգամավորը։