Դաշտային այցեր՝ «Գագաթաժողով հանուն անտառների. գլոբալ ջանքերն ու Հայաստանը» համաժողովի շրջանակում
Անդրանիկ համաժողովը մասնակիցների և ԶԼՄ-ների ներկայացուցիչների ուշադրությանը կներկայացնի Հայաստանում իրականացվող անտառվերականգնման աշխատանքները
«Էյ Թի Փի»-ն և Հայաստանի ամերիկյան համալսարանի Յակոբեան բնապահպանական կենտրոնը ներկայացնում են «Գագաթաժողով հանուն անտառների. գլոբալ ջանքերն ու Հայաստանը» խորագրով համաժողովի շրջանակում հոկտեմբերին կազմակերպվող դաշտային այցերի վերաբերյալ մանրամասներ: Հոկտեմբերի 20-ից 23-ը ընթացող քառօրյա միջոցառումը կստեղծի անտառվերականգնման բնագավառում առաջատար մասնագետների միջև գիտելիքների փոխանակման, երկխոսության և կապերի հաստատման հնարավորություններ:
Դաշտային այցերի ընթացքում ոլորտի առաջատարները հնարավորություն կունենան այցելել «Դիլիջան» ազգային պարկ և Հայաստանի տնկման վայրեր, որտեղ հողի մեջ դրված յուրաքանչյուր տնկի արհեստավարժ աշխատակիցների կողմից ապահովվում է երկրի բուսականության աճը խթանող անհրաժեշտ խնամքի բոլոր միջոցառումներով: Լինելով շրջափակված երկիր՝ Հայաստանը, ի թիվս Փարիզյան համաձայնագրի շրջանակներում ստանձնած այլ պարտավորությունների, հանձն է առել մինչև 2050 թվականը երկրի անտառածածկ տարածքների մակերեսը ավելացնել՝հասցնելով 20%-ի:
Հյուրերը հոկտեմբերի 21-ին կայցելեն Հայաստանի ամենագեղատեսիլ հյուսիսային շրջաններից մեկի՝ Տավուշի մարզում գտնվող «Դիլիջան» ազգային պարկ: Այն զբաղեցնում է շուրջ 33,765 հեկտար տարածք և առանձնանում է հարուստ ու յուրօրինակ կենսաբազմազանությամբ, անտառային լանդշաֆտներով և մշակութային հուշարձաններով: Մասնակիցները Ազգային պարկի փորձագետների ուղեկցությամբ կշրջեն Պարզ լճի շրջակայքում և կծանոթանան պարկի տարածքում առկա շուրջ 1150 բուսատեսակների, 55 կաթնասունների և 190 թռչնատեսակներին: «Դիլիջան» ազգային պարկը հանդիսանում է ՀՀ կարմիր գրքում գրանցված բուսական և կենդանական աշխարհի մի շարք հազվագյուտ և վտանգված տեսակների բնակատեղի: Զբոսավարները հյուրերին կծանոթացնեն նաև տեղանքի
պատմությանը, ինչպես նաև ներկայում պարկի առջև ծառացած խնդիրներն ու դրանց հնարավոր լուծումների վերաբերյալ տարբերակները:
Ի թիվս այլ բաների, հյուրերը կծանոթանան նաև վերջին տարիներին Դիլիջանում էկոտուրիզմի զարգացման տեմպերի զգալի աճին: Նոր արշավային արահետների ստեղծումից մինչև zip line-ի և թիավարվող նավակների առկայությունը, նրանք կուսումնասիրեն ապագայում ազգային պարկի պաշտպանության և պահպանման համար զբոսաշրջության ներուժի և դերի կարևորությունը:
Մասնակիցները նաև կհյուրընկալվեն Մարգահովիտ գյուղում, որտեղ նրանք կշրջեն «Էյ Թի Փի»-ի Օհանյան բնապահպանական կրթության կենտրոնի և 2007թ.-ին ստեղծված՝ Հրանտ Դինքի անվան անտառի տարածքով: Հյուրերը նաև կայցելեն Միրաք ընտանիքի անվան անտառվերականգնման տնկարան և ականատես կլինեն տասնակ ծառատեսակների և բույսերի, որոնք աճեցվում և խնամվում են հիմնադրամի 15 տեղաբնակ աշխատակիցների կողմից: Միրաք տնկարանը հիմնադրումից (2005թ.) մինչ այժմ հանդիսանում է Հայաստանի հյուսիսում վերատնկած միլիոնավոր ծառերի աճեցման և բազմացման վայրը:
«Մեզ համար մեծագույն պատիվ է Հայաստան հրավիրել անտառվերականգնման ոլորտում համաշխարհային առաջատարների և նրանց ներգրավել անտառվերականագնման գործընթացներում: Թեև մեր տնկած յուրաքանչյուր ծառ իր պատմությունն ունի, այնուամենայնիվ, մեր առաքելության և անտառվերականգնման աշխատանքները լավագույնս ներկայացնում են մեր թիմն ու գիտնականները»,- նշեց «Էյ Թի Փի»-ի գործադիր տնօրեն Ջինմարի Փափելյանը:
Դաշտային այցելություններից զատ, «Գագաթաժողով հանուն անտառների. գլոբալ ջանքերն ու Հայաստանը» խորագրող համաժողովը կընդգրկի պանելային և խմբային քննարկումներ, հիմնական զեկուցող՝ Օրեգոնի պետական համալսարանի դոկտոր Էնթոնի Դեյվիսի ուղերձը, ինչպես նաև կընձեռի կապերի հաստատման լայն հնարավորություններ:
Այս աշուն «Էյ Թի Փի»-ն Հայաստանում կտնկի իր վեց միլիոներորդ ծառը: