5-ամյա Ավա Մակֆարլեյնը մահացել է վտանգավոր ինֆեկցիայի հետևանքով, որը բժիշկները շփոթել են սովորական մրսածության հետ

5-ամյա Ավա Մակֆարլեյնը մահացել է վտանգավոր ինֆեկցիայի հետևանքով, որը բժիշկները շփոթել են սովորական մրսածության հետ:

Daily Mirror-ը հայտնում է, որ աղջկա մոտ շնչառական խնդիրներ են առաջացել, ջերմությունը բարձրացել է եւ ցան ու քնկոտություն է առաջացել: 2017 թվականի դեկտեմբերի 13-ին ծնողները նրան հիվանդանոց են տարել: Աղջկան զննելով՝ բժիշկները որոշել են, որ նրա մոտ սովորական մրսածություն է, նրան պարացետամոլ, իբուպրոֆեն են նշանակել եւ տուն ուղարկել:

Սակայն հիվանդանոցից վերադառնալուց հետո աղջկա վիճակը վատթարացել է, նրա ոտքերը ծածկվել են ցանով եւ մոխրագույն երանգ ստացել: Հաջորդ օրը առավոտյան ծնողները դստերը կրկին հիվանդանոց են տարել:

«Մեզ ասացին, որ նրա մոտ առկա է ջրազրկում,- հիշում է աղջկա մայրը: - Նա անչափ ուժասպառ էր»:

Աղջկան հեղուկ են տվել, բայց նրա վիճակը չի փոխվել: Բժիշկները որոշել են նրան մտցնել արհեստական կոմայի մեջ եւ հակաբիոտիկներ տալ: Բայց աղջկա վիճակը շարունակել է վատթարանալ, եւ դեկտեմբերի 15-ին նա մահացել է սեպսիսից, որն առաջացել էր ինֆեկցիոն-տոկսիկ շոկի հետեւանքով:

«Ավան որոշեց, որ բավականաչափ տանջվեց,- ասել է աղջկա մայրը: - Նրա սիրտը կանգ առավ»:

Այս գործով դատաքննություն է ընթանում: