Ուսուցիչների աշխատավարձը կբարձրանա 10 %-ով

Կառավարությունն իր այսօրվա՝ սեպտեմբերի 5-ի նիստում որոշեց բյուջեի եկամուտներն ու ծախսերը ավելացնել 1,665 մլրդ դրամով դրամով, և այդ գումարներն ուղղել սեպտեմբերի 1-ից ուսուցիչների աշխատավարձը 10 տոկոսով բարձրացնելուն:

Հարցը Կառավարությունում ներկայացրել է Կրթության, գիտության, մշակույթի և սպորտի նախարար Արայիկ Հարությունյանը:

«Մենք նաև պատրաստվում ենք սահմանել ֆինանսավորման բանաձև դպրոցների համար, որտեղ մեկ դրույքի նվազագույն շեմ կսահմանենք 108 հազար դրամը: Հույս ունեմ, որ հունվարից դա կունենանք, ինչը թույլ կտա կանխատեսելի դարձնել համակարգը, ֆինանսավորումը ավելի արդար կլինի, հաշվի կառնվեն դասարանների թիվը, թերբեռնվածությունը և այլն»,-ասաց նա:

Նախարարը նշեց, որ ֆեյք կայքերի միջոցով տարածում էին, թե համատարած կրճատում են անում դպրոցներում, որ կարողանան աշխատավարձը 10 տոկոսով բարձրացնել. «Կրճատումները եղել են սովորական, ինչպես միշտ է եղել՝ հիմնականում կապված տարիքի հետ: Այս գործընթացի հետ կապված որևէ կրճատում չկա: Ես կոչ կանեմ լրատվամիջոցներին տուրք չտալ այդ տեղեկություններին»:

Իր հերթին վարչապետ Նիկոլ փաշինյանն ասաց, որ այս ամենի նպատակը ուսուցիչների պատշաճ որակ ապահովելն է. «Մենք պետք է համոզված լինենք, որ մեր դպրոցներում աշխատում են բավարար պրոֆեսիոնալ մակարդակ ունեցող ուսուցիչներ: Իսկ դրա համար աշխատավարձերի բարձրացումը պետք է պահենք մեր ուշադրության կենտրոնում: Չեմ կարծում, որ սա հեղափոխական աճ է, բայց մյուս կողմից սա գործընթացի մեկնարկն է և դա կշարունակվի, եթե մեխանիզմները ճիշտ կառուցենք, որ դա որակի հետ ուղղակի կապ ունենա»: