Հրդեհների պատճառների մեջ մարդկային գործոնը 90 % է, եղել են դեպքեր, երբ ապացուցվել է՝ այրել են դիտավորյալ. Ցոլակյան
Այս ամռան ամիսների հրդեհների պատճառների մեջ մարդկային գործոնը 90 տոկոս է: Այս մասին այսօր՝ սեպտեմբերի 4-ին, լրագրողների հետ զրույցում նշեց ԱԻ նախարար Ֆելիքս Ցոլակյանը
«Մենք ունենք դեպքեր, որ ապացուցված է, որ այրել են դիտավորյալ: Երեք դեպքով դատախազությունում քրգործեր կան: Մեր հետաքննությունը փոխանցել ենք դատախազություն»,- ասաց նա՝ հավելելով, որ դրանք համեմատաբար փոքր հրդեհների դեպքեր են:
ԱԻՆ նախարարը չի պարզաբանում սակայն, արդյոք խոսքը հենց «Ձյունիկ» ՍՊԸ-ում տեղի ունեցած հրդեհի մասին է:
«Ձյունիկ» սառնարան» ընկերությունում խոշոր հրդեհի մասին Ցոլակյանն ասաց, որ իրենք մինչեւ հիմա էլ հերթապահություն են իրականացնում: «Այնտեղ բարդ պրոցես կա, հանգցնելուց հետո պետք է փչացած ապրանքը, մթերքը դուրս հանել այնտեղից: Դա մեզ հաջողվեց կառավարության աջակցությամբ. մոտ հազար տոննա փչացած մսամթերք հանվեց, որը շատ վտանգավոր էր»,-ասաց Ցոլակյանը:
«Մեր նախնական հետաքննության նյութերը տրվել են տարբեր տեղեր փորձաքննության: 4-5 փորձաքննություն է արվում, որոնց արդյունքները կստանանք, և դատախազությունը կորոշի: Նույնը վերաբերում է նաև «Մալաթիա մոլի» հրդեհին: Դա էլ դեռ չենք կարող բարձրաձայնել, դիտավորյալ էր, թե՝ ոչ»,- ընդգծել է նախարարը: