Երեք կանադացի ազգային վիճակախաղի ջեքփոթ են տարել, շահումը՝ 6,8 մլն դոլար

«6-ը 49-ից» ազգային վիճակախաղի ջեքփոթը՝ 9 մլն կանադական դոլար (6,8 մլն ԱՄՆ դոլար) միմյանց միջեւ կկիսեն Կանադայի երեք քաղաքացիներ։ Այս մասին կիրակի տեղեկացրել են OLG ընկերության ներկայացուցիչները, որն իրականացնում է վիճակախաղը, փոխանցում է ՏԱՍՍ-ը։

«Շահած համարներն են՝ 2, 21, 22, 24, 48 եւ 49»,- ճշտել են կազմակերպիչները։ Ներկա պահին հայտնի է, որ մեկ շահող տոմսը վաճառվել է Օնտարիո նահանգում, եւս երկուսը՝ Կանադայի կենտրոնական շրջաններից մեկում։ Բացի այդ, խաղարկվել է նաեւ այսպես կոչված մխիթարական մրցանակ՝ մեկ միլիոն կանադական դոլարի չափով (ավելի քան 750 հազար ԱՄՆ դոլար)։ Այն բաժին կհասնի Օնտարիոյի բնակչին։

«6-ը 49-ից» խաղի կանոններով՝ մրցանակն ստանալու համար անհրաժեշտ է կազմակերպիչներին ներկայացնել շահած տոմսը, իսկ հաղթողի կամ հաղթողների անունը պետք է ներկայացվի հասարակությանը։ Այս դեպքում շահումը հավասար կկիսվի երեք խաղացողների միջեւ։

Կանադայի պատմության մեջ ամենախոշոր շահումային ֆոնդը՝ 64 մլն կանադական դոլար չափով (այդ պահին՝ 49,5 մլն ԱՄՆ դոլար) խաղարկվել է «6-ը 49-ից» վիիճակախաղում 2015 թվականին։ Եվս մի քանի անգամ 2015-2019 թվականներին երկրում գրանցվել են շահումներ 60 մլն-ի չափով մեկ այլ հանրածանոթ վիճակախաղում՝ Lotto Max-ում։ Այդ շահումների գումարը միջինը կազմել է 46 մլն դոլար։