Եթե մենք չփոխենք մեր կրթության համակարգը, մենք բոլորս խնդիրներ կունենանք. Ջեք Մա
Միլիարդատեր, Alibaba ընկերության հիմնադիր Ջեք Ման ասել է, որ մարդիկ պետք է աշխատեն շաբաթը 12 ժամ, եւ աշխատանքի մեծ մասը նրանց փոխարեն պետք է կատարի արհեստական ինտելեկտը։ Այս մասին տեղեկացնում է ՌԲԿ-ն՝ հղում կատարելով Bloomberg-ին։
Ելույթ ունենալով Շանհայում Արհեստական ինտելեկտի համաշխարհային գիտաժողովում՝ Ման կարծիք է հայտնել, որ մարդիկ պետք է աշխատեն շաբաթը ընդամենը երեք օր, չորսական ժամ օրական։ Նրա խոսքով՝ դրան կարելի է հասնել տեխնիկական առաջընթացի եւ կրթության համակարգի բարեփոխման շնորհիվ։
«Հաջորդ 10-20 տարիների ընթացքում ամեն մարդ, երկիր, կառավարություն պետք է կենտրոնանա կրթության համակարգի բարեփոխումների վրա, որպեսզի մեր երեխաները կարողանան աշխատանք գտնել, որը պահանջում է շաբաթն ընդամենը երեք օր եւ օրական չորս ժամ։ Եթե մենք չփոխենք մեր կրթության համակարգը, մենք բոլորս խնդիրներ կունենանք»,- ասել է նա։
Ման մարդուն ավելի շատ ազատ ժամանակ տվող նոր տեխնոլոգիաների օրինակ է նշել էլեկտրականությունը։ Նրա խոսքով՝ շնորհիվ էլեկտրականության մարդիկ ժամանակ են ունեցել, որպեսզի երեկոյան գնան կարաոկե կամ դիսկոտեկ, իսկ արհեստական ինտելեկտը մարդկանց ավելի շատ ժամանակ կտա, որպեսզի բավականություն ստանան այն բանից, որ մարդ են։
Դեռեւս ապրիլին, սակայն, Ջեք Ման միանգամայն այլ տեսակետ էր հայտնել։ Այն ժամանակ նա հանդես էր եկել ի պաշտպանություն արտաժամյա աշխատանքի, որը, նրա պնդմամբ, տարածված է իր ընկերությունում։ «Անձամբ ես կարծում եմ, որ շաբաթը վեց օր աշխատելու հնարավորությունը առավոտյան իննից մինչեւ երեկոյան ինը՝ մեծ երանավետություն է։ Շատ ընկերություններ եւ շատ մարդիկ հնարավորություն չունեն աշխատելու առավոտյան իննից մինչեւ երեկոյան ինը։ Եթե դուք այս ռեժիմով չեք աշխատում, երբ երիտասարդ եք, ուրեմն էլ ե՞րբ նման հնարավորություն կունենա՞ք»,- ասել է Ման։