Անհրաժեշտ է, որ Բելառուսն ու Թուրքիան համակարգեն առևտրա-տնտեսական հարաբերությունները և զգալիորեն մեծացնեն ապրանքաշրջանառությունը. Լուկաշենկո
Անհրաժեշտ է, որ Բելառուսն ու Թուրքիան համակարգեն առեւտրա-տնտեսական հարաբերությունները եւ զգալիորեն մեծացնեն ապրանքաշրջանառությունը: Բելառուսի նախագահ Ալեքսանդր Լուկաշենկոն այս մասին հայտարարել է Թուրքիայի ԱԳ նախարար Մեւլութ Չավուշօղլուի հետ հանդիպման ժամանակ, հաղորդվում է Բելառուսի նախագահի պաշտոնական կայքում:
«Վստահ եմ, որ Ձեր այցը կնպաստի մեր հարաբերությունների համակարգմանը, առևտրա-տնտեսական հարաբերությունների կանոնավորմանը, այն խնդիրների լուծմանը, որոնք մեզ մոտ առկա են: Գլխավորն այն է, որ Դուք դրանցից չամաչեք, նշեք, իսկ մենք Ձեզ հասկանալով՝ կարողանանք դրանց արժանապատվորեն արձագանքել»,- ասել է Բելառուսի նախագահը:
Պետության ղեկավարը նշել է Բելառուսի եւ Թուրքիայի հարաբերությունների առանձնահատուկ բարեկամական բնույթը. «Այն քաղաքականության շնորհիվ, որը վարում են ԱԳՆ-ն եւ ձեր նախագահը, մենք Թուրքիայի Հանրապետության հետ շատ լավ հարաբերություններ ունենք: Մենք ձեզ հետ համագործակցում ենք բոլոր ուղղություններով: Մեր միջեւ համագործակցության եւ հարաբերությունների մեջ փակ թեմաներ չկան: Մենք չափազանց երկար եւ դժվար ճանապարհ ենք անցել: Մեր առջեւ կանգնել են տարբեր մարտահրավերներ, մենք ձեզ հետ միասին լուծել ենք տարբեր հարցեր, որոնց մասին մինչեւ հիմա խոսում ենք: Հարկ է արժանին մատուցել՝ մենք հաջողությամբ ենք լուծել խնդիրները, որոնք առաջացել են ձեզ հետ միասին մեզ մոտ եւ ընդհանրապես միջազգային հարաբերություններում»,- շարունակել է Ալեքսանդր Լուկաշենկոն:
Դրա հետ մեկտեղ, անհրաժեշտ է առեւտրա-տնտեսական հարաբերությունները նոր մակարդակի հասցնել: «Անելու աշխատանք կա: Մենք, իհարկե, պետք է կատարելագործենք հարաբերությունների, առեւտրա-տնտեսական հարաբերությունների հիմքը: Այնպիսի երկրները, ինչպիսին են Թուրքիան եւ Բելառուսը, որոնք զարգացման մեծ ներուժ ունեն, կարող են ունենալ բազմապատիկ ավելի ապրանքաշրջանառություն, քան հիմա է: Մեզ մոտ, կարելի է ասել, այդ հարցում ինչ-որ խառնաշփոթ է»,- վստահ է Բելառուսի նախագահը: