Իմ դեմ դատական հայցն իրականում ներկայացրել է Հայաստանի վարչապետ Նիկոլ Փաշինյանը՝ Երևանի քաղաքապետ Հայկ Մարությանի միջոցով. Սոնա Աղեկյան

Իմ դեմ դատական հայցն իրականում ներկայացրել է Հայաստանի վարչապետ Նիկոլ Փաշինյանը՝ Երևանի քաղաքապետ Հայկ Մարությանի միջոցով: Օգոստոսի 27-ին լրագրողների հետ հանդիպման ժամանակ այս մասին ասաց «Այլընտրանքային քաղաքապետարան» նախաձեռնության անդամ, Երևանի ավագանու նախկին անդամ Սոնա Աղեկյանը:

Նրա խոսքով՝ սա կապված է թռուցիկներ փակցնելու հետ՝ «Իմ աղբը» գրությամբ և Նիկոլ Փաշինյանի ու Հայկ Մարությանի պատկերներով: «Եթե Հայկ Մարությանը հայցը ներկայացրել է որպես Կարգին Հայկո, ապա մենք մարտահրավերն ընդունում ենք: Իսկ եթե քաղաքապետը, որը մայրաքաղաքում իրավիճակի գլխավոր պատասխանատուն է, այդ թվում՝ նաև աղբի հետ կապված իրավիճակի, ապա նա պետք է հասկանա, որ իշխանությունների հասցեին քննադատությունը ցանկացած ժողովրդավարական երկրում նորմալ երևույթ է (այս դրույթն ամրագրված է նաև միջազգային իրավունքում): Այդ դեպքում նա պետք է զուսպ լինի, իրեն ուղղված քննադատությունից եզրակացություն կատարի և խնդրի լուծման միջոցներ ընդունի: Այս պատճառով մեր դեմ Փաշինյանի հայցը՝ ի դեմս Մարությանի հիմազուրկ է»,- նշեց ընդդիմադիրը՝ հավելելով, որ իրենք կշարունակեն իշխանությունների բռնապետական դրսևորումների դեմ պայքարը, որոնք խաղաղ ակցիաներ անցկացնող մարդկանց քաղաքական հետապնդման են ենթարկում:

Աղեկյանի խոսքով՝ սա արտահայտվում է այն բանում, որ իրենց բերման են ենթարկում առանց պահանջ ներկայացնելու և պատճառը պարզաբանելու:

«Այս պահին մեր 8 կողմնակիցներ որպես մեղադրյալ են ներգրավված, և նրանց նկատմամբ որպես խափանման միջոց է ընտրվել չհեռանալու մասին ստորագրությունը»,- հայտնեց Սոնա Աղեկյանը:

Նա վստահություն հայտնեց, որ քաղաքի իշխանությունների քաղաքականությունը աղբի հետ կապված խնդիրների լուծման հարցում կարելի է որակել միայն որպես հանցավոր անգործություն, իսկ նրանց քայլերը, մասնավորապես՝ տեխնիկայի գնումը մանկապարտեզների վերանորոգման բյուջեի կրճատման հաշվին, բացարձակապես անթույլատրելի:

Երևանցիները տարեկան 5 մլրդ 200 մլն դրամ են վճարում «Սանիթեք» ընկերությանը, և անհասկանալի է, թե ինչու պետք է լրացուցիչ փող վճարեն»,- վրդովվեց Սոնա Աղեկյանը:

«Մենք շարունակելու ենք մեր ակցիաները, և շուտով կանցկացվեն լայնածավալ միջոցառումներ՝ կապված աղբահանության և քաղաքի այլ խնդիրների հետ: Եթե իշխանությունները չեն կարողանում քաղաքական կամք դրսևորել, դուրս գալ ժողովրդի մոտ և նրա հետ շփվել, ինչպես դա անում էին՝ ձայներ աղերսելով ընտրությունների ժամանակ, ապա պետք է զիջեն նրանց, ովքեր իրականում տիրապետում են իրավիճակին և կարող են լուծել երևանցիների խնդիրները: Եթե Մարությանը, որին մեզ պարտադրեց Փաշինյանը, չի կարողանում կատարել իր պարտականությունները, ապա դրա պատասխանատվությունը պետք է կրի վարչապետը»,- եզրափակեց «Այլընտրանքային քաղաքապետարան» նախաձեռնության անդամ Սոնա Աղեկյանը:

Հիշեցնենք, ավելի վաղ Operativ լրատվականը հաղորդել էր, որ Երևանի քաղաքապետ Հայկ Մարությանը դատի է տվել Սոնա Աղեկյանին