Կիբորգները կփոխարինեն մարդկանց և կվերափոխեն աշխարհը
Գիտնական և ֆուտուրիստ Ջեյմս Լավլոկը կարծում է, որ կիբորգները կփոխարինեն մարդկանց և կվեարփոխեն աշխարհը։ «Մեր գերազանցությունը՝ որպես Երկրի գլխավոր բնակիչների և տիեզերքի պիոներների, արագ մոտենում է ավարտին»,- կարծում է Լավլոկը, տեղեկացնում է Americaru-ն։
Տասնյակ հազարավոր տարիների ընթացքում մարդիկ իշխել են որպես մեր մոլորակի միակ բանական, ինքնագիտակից տեսակ։ Բայց ինտելեկտուալ մեքենաների աճը նշանակում է, որ ամեն բան կարող է շուտով փոխվել, գուցե նաև մեր սեփական կյանքը։ Շուտով Homo Sapiens-ը լիովին կանհետանա մոլորակի երեսից, քանի որ մեզ ամբողջովին կփոխարինեն կիբորգները։
Լավլոկը նկարագրում է դրանք որպես ժամանակակից ռոբոտների և արհեստական ինտելեկտի համակարգերի ինքնաբավ, ինքնագիտակից հետնորդներ։ Նա դրանց տիրապետության գալիք դարաշրջանն անվանում է Նովացեն։
Ի տարբերություն տեխնոթերահավատների, այդ թվում ևւ Լուիսվիլի համալսարանի գիտնական, համակարգչային մասնագետ Ռոման Յամպոլսկու, Լավլոկը սակավ հավանական է համարում, որ մեր մեքենաները կպայքարեն մեր դեմ Տերմինատորի նման։ Չի լինի նաև երանավետ միություն՝ կիբորգները պարզապես դուրս կմղեն մարդկանց որպես տեսակ։
Լավլոկի խոսքով՝ Նովացենի առաջին փուլերն արդեն սկսվել են։ Նա բերում է AlphaZero համակարգչային ծրագրի օրինակը, որը սովորել է խաղալ գո և դարձել է աշխարհի ամենալավ խաղացողը։ Արդի համակարգիչներն արդեն կարող են մշակել տվյալները շատ ավելի արագ, քան մենք։ «Շնորհիվ լիովին անկախ արհեստական ինտելեկտի՝ վաղվա կիբորգները կդառնան մեզնից միլիոն անգամ ավելի խելացի, և մենք պարզապես կանհետանանք»,- ասում է Լավլոկը։