Վենետիկի հանձնաժողովի պատասխանը Ռոբերտ Քոչարյանի գործով

Վենետիկի հանձնաժողովը հայտնել է Ռոբերտ Քոչարյանի գործով Սահմանադրական դատարանին խորհրդատվություն տրամադրելու պատրաստակամություն, ինչի համար ՍԴ-ն դիմել էր հանձնաժողովին շաբաթներ առաջ: Վենետիկի այդ պատրաստակամության մասին հայտնել է ՍԴ ֆեյսբուքյան հաղորդագրությունը: ՍԴ-ն խորհրդատվության համար դիմել է նաև ՄԻԵԴ:

Վենետիկի հանձնաժողովի խորհրդատվական մասնագիտական աջակցության պատրաստակամությունն, անշուշտ, ունի քաղաքական նշանակություն: Եթե այդ խորհրդատվությունը երկրորդ նախագահի համար դրական լինի, ապա դա կլինի շոշափելի հարված նրա գործում կառավարության քաղաքականությանը՝ մասնավորապես վարչապետին ենթակա իրավապահ կառույցների, գործը վարող քննչական մարմնի, իրավախորհրդատուների, ընդ որում լայն՝ նաև Սահմանադրական դատարանի շուրջ ստեղծված իրավիճակի համատեքստով:

Եթե Վենետիկը տա դրական խորհրդատվություն՝ որ Ռոբերտ Քոչարյանը իր գործի հատկանիշով անձեռնմխելի է, ապա դրանից հետո Սահմանադրական դատարանի ուղղությամբ գործադիր իշխանության որևէ քայլ ինքնաբերաբար հայտնվելու է այդ խորհրդատվության ստվերում և ակնառու գնահատվելու է իբրև Ռոբերտ Քոչարյանի գործով Սահմանադրական դատարանի վրա կատարվող ճնշում:

Դեռևս Վենետիկ և ՄԻԵԴ ՍԴ դիմումի մասին տեղեկատվության հրապարակման ժամանակ առիթ ենք ունեցել արձանագրելու, որ Հրայր Թովմասյանի այդ քայլը ոչ միայն, իսկ գուցե ոչ այնքան Ռոբերտ Քոչարյանի համար արվող քայլ է, որքան հենց Սահմանադրական դատարանի և դրանում իր դիրքի որոշակի իմունիտետ ձեռք բերելու: Քոչարյանի գործով խորհրդատվություն տրամադրելու Վենետիկի պատրաստակամությունն այդ իմաստով որոշակի իմունիտետային աջակցություն է ՍԴ ներկայիս ղեկավարությանը: Վենետիկը գործնականում ժամանակ է շահում Հրայր Թովմասյանի համար: Մյուս կողմից՝ գուցե նաև իշխանության համար, որը առկախված է թողել Սահմանադրական դատարանի հարցը, որը հասունացրել է իր իսկ նախաձեռնությամբ:

Առավել մանրամասն՝ սկզբնաղբյուրում: