«Ռուսթավի-2»-ի նոր ղեկավարությունն աշխատանքից հեռացրել է Պուտինին վիրավորած հաղորդավար Գաբունիային
«Ռուսթավի-2» հեռուստաընկերության տնօրեն Պաատա Սալիան հայտարարել է հեռուստաալիքի լրատվական ծառայության ղեկավար Նոդար Մելաձեին և ՌԴ նախագահ Վլադիմիր Պուտինին վիրավորած հայտնի սկանդալային հաղորդավար Գեորգի Գաբունիային աշխատանքից ազատելու մասին, հաղորդում է Sputnik –Վրաստանը:
Որպես պատճառ նա նշել է շահերի բախումը:
«Ես հաստատում եմ, որ Նոդար Մելաձեի հետ կազատվի մի քանի մարդ: Նոդար Մելաձեի և այն մարդկանց վերաբերյալ, որոնք ունեն շահերի բախում և որոնք այժմ արձակուրդում են, նրանց վերադարձից հետո համապատասխան որոշում կընդունվի», - ասուլիսին ասել է Սալիան:
Նա հասկացրել է, որ կհեռացվեն այլ առաջատար լրագրողներ, այդ թվում Էկա Կվեսիտաձեն, որը հայտարարել է «Ռուսթավի-2»-ի նախկին գլխավոր տնօրեն Նիկա Գվարամիայի հետ նոր հեռուստաալքիի ստեղծման մասին, Նանուկա Ժորժոլիանին և հայտնի սկանդալային հաղորդավար Գեորգի Գաբունիան:
«Դա զուտ շահերի բախում է: Չի կարելի, որ մարդը, որն աշխատում է այդ ալիքում, ցանկանա սեփականատիրոջ փոփոխություն և դրա համար ջանք չխնայի: Հետևաբար մենք կարծում ենք, որ այդ մարդիկ չեն կարող աշխատել ալիքում: Համապատասխան որոշում է ընդունվել այն մարդկանց կապակցությամբ, որոնք այժմ արձակուրդում են և արձակուրդի ընթացքում մեր կարծիքով անում են անպատասխանատու հայտարարություններ այն մասին, որ իբրև թե մասնակցում են նոր հեռուստաալիքի ստեղծմանը, ինչը ուղղակիորեն արգելված է մեր աշխատանքային պայմանագրով», - ասել է Սալիան:
Որոշումն ընդունվել է, քանի որ այդ մարդկանց չի հետաքրքրում «Ռուսթավի 2»-ը, նրանց հետաքրքրում է միայն այն, որ ալիքը ղեկավարի կոնկրետ մարդ՝ Միխայիլ Սաակաշվիլին, թեև նա պաշտոնապես ալիքի սեփականատերը չի եղել, պարզաբանել է Սալիան:
Քիչ առաջ էլ Operativ լրատվականը հաղորդել էր, որ «Ռուսթավի-2» հեռուստաընկերության լրատվական ծառայության հաղորդավարները ուղիղ եթերում հայտարարել են հեռուստաալիքից իրենց հեռանալու մասին