«Ռուսթավի-2» հեռուստաընկերության լրատվական ծառայության հաղորդավարները ուղիղ եթերում հայտարարել են հեռուստաալիքից իրենց հեռանալու մասին
«Ռուսթավի-2» հեռուստաընկերության լրատվական ծառայության հաղորդավարները ուղիղ եթերում հայտարարել են հեռուստաալիքից իրենց հեռանալու մասին, հայտնում է «Նովոստի-Գրուզիան»:
Դիանա Ջոջուան և Միխայիլ Սեսիաշվիլին երեկ 21:00-ին սովորականի պես մտել են «Կուրյեր» ամփոփիչ լրատվական թողարկման եթեր: Սակայն նրանք չեն սկսել պատմել նորությունների մասին, այլ հայտարարել են, որ լքում են հեռուստաընկերությունը, որտեղ, նրանց խոսքով, «տոտալ զտում է սկսվել»:
Երեկ ցերեկը հայտնի էր դարձել, որ հեռուստաընկերության նոր ղեկավարությունը պաշտոնից հեռացրել է «Ռուսթավի-2»-ի լրատվական ծառայության ղեկավար Նոդար Մելաձեին, նրա տեղակալ Գեորգի Լապերաշվիլիին, քաղաքական թոք-շոու վարող Գեորգի Գաբունիային, «Շաբաթվա շեշտադրումներ» քաղաքական թոք-շոու վարող Էկա Կվեսիտաձեին և Հեղինակային հաղորդման վարող Նանուկա Ժորժոլիանիին: Ավելի ուշ հեռուստաընկերությունից հեռանալու մասին հայտարարել է «Կուրյերի» ևս մեկ վարող՝ Պաատա Յակոբաշվիլին:
«Ռուսթավի-2»-ում իրավիճակը սրվել էր այն բանից հետո, երբ Վրաստանում ամենաբարձր վարկանիշ ունեցող հեռուստաընկերությունը դատարանի 2019 թվականի հուլիսի 18-ի որոշմամբ մի քանի տարի տևած դատաքննությունից հետո անցել էր նախկին սեփականատերերից մեկին՝ իշխանությունների հանդեպ չեզոք տրամադրված բիզնեսմեն Կիբար Խալվաշին: 2012 թվականին Վրաստանում իշխանափոխությունից հետո «Ռուսթավի-2»-ը խիստ քննադատության էր ենթարկում միլիարդատեր Բիձինա Իվանիշվիլիի կառավարության և նրա ղեկավարած «Վրացական երազանք» կուսակցության քաղաքականությունը: Հեռուստաընկերությունն աջակցում էր արևմտամետ ընդդիմությանը, առաջին հերթին՝ ամենախոշոր ընդդիմադիր կուսակցություն «Միասնական ազգային շարժմանը», որի առաջնորդն է շարունակում մնալ Վրաստանի երրորդ նախագահ Միխայիլ Սաակաշվիլին:
Հաղորդավարների զգացմունքային ելույթից հետո «Կուրյերն» ավարտվել է 21:07-ին, և եթերում կինոֆիլմ են ցուցադրել: Սովորաբար լուրերի ամփոփիչ թողարկումը տևում է 45 րոպեից մեկ ժամ:
«Կարմիր գծերը հատվել են: «Ռուսթավի-2»-ում սկսվել է տոտալ զտում: Սա վերջ է նաև ինձ համար, այնպիսի «Ռուսթավի-2»-ի վերջը, որը ես սիրում էի, և որը գնահատում էր հեռուստադիտողը: Ես 12 տարի աշխատել եմ այս թիմի հետ, և սա ավելին էր, քան ուղղակի աշխատանքը, սա ընտանիք էր, մարդկանց միասնություն, որոնք միավորված էին ընդհանուր գաղափարի շուրջը, կոփվել էին պայքարում, մարդիկ, որոնք այս երկրում ազատ տարածություն և լավագույն հեռուստատեսային արտադրանք էին ստեղծում: Ես այսօր լքում եմ «Ռուսթավի-2»-ը, բայց հույս ունեմ, որ դեռ կհանդիպենք: Պայքարը շարունակվում է՝ հանուն լավագույն ապագայի, հանուն ազատ Վրաստանի»,- ասել է Միխայիլ Սեսիաշվիլին:
«Ես հրաժեշտ եմ տալիս ձեզ, կհանդիպենք այլ տարածքում և այլ ալիքում: Երկրի փրկության համար պայքարը շարունակվում է»,- ասել է Դիանա Ջոջուան, որը հեռուստաընկերությունում 13 տարի ամփոփիչ լուրերի հաղորդավարն էր:
Հաղորդավարուհին նշել է, որ «Ռուսթավի-2»-ի առաջատար լրագրողներին «աշխատանքից ազատել է Իվանիշվիլիի ռեժիմը»:
«Ռուսթավի-2»-ը լոգո չէ, դա մեր կյանքն է, և ինչպես մի անգամ ասել էր Նոդար Մելաձեն՝ «ազատության տարածք»: Դա մարդիկ են, նրանց արհեստավարժությունը և հավատարմությունը: Բոլորին հաջողություն եմ մաղթում, այդ թվում նաև նրանց, ովքեր դեռ հավատում են, որ կարող են պահպանել ազատությունը՝ աշխատելով Բիձինա Իվանիշվիլիի հեռուստատեսությունում: Ես Դիանա Ջոջուան եմ, որին Կրեմլը վտարել է Աբխազիայից, ոչ մի պատճառով, ոչ մի արդարացման դեպքում չեմ կարող շարունակել գտնվել եթերում, որը պատկանում է Կրեմլի գլխավոր ծառա Բիձինա Իվանիշվիլիին:
Այսօր ես ստիպված եմ ձեզ «ցտեսություն» ասել: Մենք պայքարում էինք, սակայն այսօր Իվանիշվիլին վերջնականապես օկուպացրեց ալիքը: Մեզանից խլեցին խոսքի ազատությունը: Ես չեմ աշխատի մի հեռուստաընկերությունում, որտեղից չեմ կարող ասել, թե ինչ է իրականում կատարվում երկրում, որը դեպի անդունդն է գլորվում: Դրա համար ես հեռանում եմ այստեղից, որը իմ երկրորդ տունն էր… Շնորհակալություն այն մարդկանց, որոնց հետ միասին ես ամենավարկանիշային ալիքում ամենագերազանց լուրերի թողարկումն էի անում: Եվ իհարկե՝ շնորհակալություն իմ հեռուստադիտողին, որ ընտրում էին «Ռուսթավի-2»-ը: Ես հրաժեշտ եմ տալիս ձեզ, կհանդիպենք այլ տարածքում և այլ ալիքում: Երկրի փրկության համար պայքարը շարունակվում է»,- իր ուղերձում ասել է Դիանա Ջոջուան: