Հրատապ. Երևանի քաղաքապետ Հայկ Մարությանը դատի է տվել Սոնա Աղեկյանին
Երևանի քաղաքապետ Հայկ Մարությանը դատական հայց է ներկայացրել Երևանի ավագանու նախկին անդամ Սոնա Աղեկյանի դեմ: Այս մասին տեղեկանում ենք Դատական տեղեկատվական համակարգից:
Քաղաքապետը պահանջում է Աղեկյանին պարտավորեցնել պատվին և արժանապատվությանը պատճառված վնասի հատուցում եւ հերքում:
Հայցադիմումը ներկայացվել է օգոստոսի 15-ին և մակագրվել Երեւան քաղաքի ընդհանուր իրավասության դատարանի դատավոր Տաթեւիկ Ստեփանյանին:
Նշենք, որ «Այլընտրանքային քաղաքապետարան» նախաձեռնության անդամ, Երեւանի նախկին ավագանու «Երկիր ծիրանի» խմբակցության անդամ Սոնա Աղեկյանը բազմիցս քննադատական հայտարարություններով է հանդես գալիս քաղաքապետարանի եւ քաղաքապետ Հայկ Մարությանի հասցեին:
Մասնավորապես, օգոստոսի 9-ին նա մամուլի ասուլիսի ժամանակ հայտարարել է, թե քաղաքապետարանում կոռուպցիան աննախադեպ մակարդակի է հասել:
Նախօրեին Սոնա Աղեկյանը Facebook-ի իր էջի ուղիղ եթերում դիմելով Հայկ Մարությանին՝ ասել էր. «Պարո՛ն պարտադրված քաղաքապետ, կներեք, որ ձեզ դիմեցի, դուք անզոր եք եւ անմեղսունակ: Պարոն վարչապետ, դուք մեզ պարտադրեցիք մի քաղաքապետ, որը ասում էր, որ կանաչապատելու է, ուզում եմ հասկանամ` որտեղ եք կանաչապատել»: Նա նաեւ պարբերաբար աղբ եւ կեղտաջուր է բերում քաղաքապետարանի դիմաց լցնում՝ այդպես արտահայտելով իր բողոքն ընդդեմ Երեւանում աղբահանության անմխիթար վիճակի: