Շատ խնդրահարույց կլինի այդ եզրակացության պայմաններում Ամուլսարի հանքի շահագործումը թույլ տալը. Վարազդատ Կարապետյանը Ամուլսարի հանքի շուրջ իրավիճակի վերաբերյալ
Եզրակացությունը կարդացել եմ եւ գտնում եմ, որ շատ խնդրահարույց կետեր կան եւ շատ խնդրահարույց կլինի այդ եզրակացության պայմաններում Ամուլսարի հանքի շահագործումը թույլ տալը: Այս մասին, այսօր՝ օգոստոսի 19-ին, ՔՊ-ում ՀՀ վարչապետ Նիկոլ Փաշինյանի հետ հանդիպումից առաջ լրագրողների հետ զրույցում նշեց «Իմ քայլը» խմբակցության պատգամավոր Վարազդատ Կարապետյանը:
Նա ընդգծեց, որ Ամուլսարի հանքի վերաբերյալ «Էլարդ» ընկերության կողմից իրականացված փորձաքննության եւ եզրակացության հետ կապված բազմաթիվ խնդիրներ կան. «Պետք է քննարկենք, հասկանանք, թե ինչ ռիսկեր կան, ինչպես կարելի է խուսափել դրանցից»:
Վարազդատ Կարապետյանը հստակեցրեց, որ ինքը ոչ թե կասկածի տակ է դնում «Էլարդ» ընկերության եզրակացությունը, այլ ասում է, որ այդ եզրակացությունում կան կետեր, որոնց առկայության պայմաններումհանքի շահագործումը թույլատրելի չէ:
Ինչ վերաբերում է տեսակետին, որ «Իմ քայլը» խմբակցության պատգամավորները, որոնք միշտ դեմ են եղել հանքի շահագործմանը, պետք է հիմա վայր դնեն իրենց մանդատները, արդյոք ինքը խպատրաստ է նման քայլի, Վարազդատ Կարապետյանն արձագանքեց. «Եկեք հարցի քաղաքական կողմին անդրադառնանք այս հանդիպումից հետո»:
Ավելի վաղ Operativ լրատվականը հայտնել էր, որ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները, որի կատարումը հանձնարարվել էր Advanced Resources Development (ELARD) ընկերության փորձագետների խմբին:
Ըստ այդ փորձաքննության արդյունքների՝ եզրակացության ընթացքում 16 կետ է նշվել, որոնք պահպանելու դեպքում բնապահպանական ռիսկերը կդառնան կառավարելի:
Բաղրամյան 26-ում վարչապետ Նիկոլ Փաշինյանը ջերմուկցիներին հրավիրել էր հանդիպման:
Միաժամանակ Բաղրամյան-26-ի դիմաց բողոքի ակցիա էր ընթանում ընդդեմ Ամուլսարի հանքի շահագործման:
Ակցիայի մասնակիցներից մեկն էլ ասել էր, թե՝ «Սերժիզմը շարունակվում է ու եթե ինքը չսթափվի, ինքը արժանանալու է Սերժ Սարգսյանի ճակատագրին»: