«Վարչապետն ասել է՝ Ամուլսարի հանքը պիտի շահագործվի, հետևաբար` շարունակում ենք մեր պայքարը». Բաղրամյան պողոտայում ոստիկանները բերման են ենթարկում բնապահպաններին (Տեսանյութ)
Ամուլսարի պայքարը շարունակվում է: Այս մասին այսօր` օգոստոսի 19-ին, լրագրողներին ասաց ակտիվիստ Անի Խաչատրյանը, ով մասնակցում էր վարչապետի հետ քննարկմանը:
«Ուզում եմ ասել, որ Ամուլսարի պայքարը շարունակվում է, Ամուլսարը սար է մնալու: Ամուլսարի պայքարը հանուն իրավունքի պայքար է, պայքար է ապրելու մաքուր միջավայրում, էս մեր երկրի պայքարն է ու մենք մինչեւ վերջ պայքարելու ենք, Ամուլսարը սար է մնալու, ու թող բոլորը դա ականջներին օղ անեն»,- ասաց Անի Խաչատրյանը:
Անի Խաչատրյանը հայտնեց նաև, որ եթե Ամուլսարի հանքի շահագործման հարցով կառավարության որոշումը դրական լինի, ապա ջերմուկցիները կշարունակեն փակ պահել դեպի հանք տանող ճանապարհները:
«Եթե որոշում կայացվի հանքը շահագործելու, պատրաստվում ենք փակ պահել հանք տանող ճանապարհները: Չեմ թողնելու իմ թոռները հաշմանդամ լինեն: 14 հոգի տնից եկել ենք պաշտպանենք մեր սարը, որ մեր երեխեքը վաղը-մյուս օր մաքուր օդ շնչեն: Եթե վարչապետը մերժել է Սերժին, ուրեմն պիտի մերժի Սերժի կողմից եկած բոլոր բացասական ծրագրերը: Դա չպիտի լինի քննարկման ենթակա»,- ասաց ակցիայի մեկ այլ մասնակից :
Բնապահպանները լրագրողներին հայտնեցին՝ վարչապետն ասել է՝ Ամուլսարի հանքը պիտի շահագործվի, հետևաբար` իրենք որոշել են շարունակվել պայքարը:
Ոստիկանների ու ակցիայի մասնակիցներից մեկի միջև բախում տեղի ունեցավ: Քաղաքացին զայրացած դիմեց ոստիկանին՝ ասելով. «Ձեր գործառույթը քաղաքացու վրա բղավելը չէ»:
«Եթե գոռալով ա, ընենց կգոռամ, որ չես պատկերացնի, եկել ենք ստեղ, նորմալ մեր գործը անենք»,- պատասխանեց ոստիկանը:
Բաղրամյան պողոտայում ոստիկանության աշխատակիցներն սկսեցին բերման ենթարկել բնապահպան ակտիվիստներին, որոնք ցանկանում էին փակել Բաղրամյան պողոտան:
Այն բանից հետո, երբ ոստիկանները թույլ չտվեցին բողոքի ակցիայի մասնակիցներին մտնել ԱԺ այգի, նրանք ցանկացան փակել պողոտան:
Ցուցարարներից ոմանք նստեցին գետնին: Ոստիկանությունը ժամանակ տվեց պողոտան ազատելու համար:
Քաշքշոց սկսվեց ոստիկանների եւ բնապահպանների միջեւ, կարմիր բերետավորները սկսեցին բերման ենթարկել ցուցարարներին, այդ թվում բնապահպաններ Անի Խաչատրյանին, Գեղամ Ադյանին: Քաշքշոցի ընթացքում գետնին տապալվեց քաղակտիվիստ, իրավապաշտպան Զարուհի Հովհաննիսյանը:
Վերջինս նշեց, որ շատ անհամաչափ են ոստիկանության գործողությունները. «Դա ցույց է տալիս իրական հեղափոխության արդյունքը»:
Ցուցարարներից Անի Հակոբջանյանն էլ նշեց. «Մենք որոշել էինք խաղաղ քննարկում անցկացնել; ԱԺ այգում, բայց չգիտես ում հրահանգով որոշեցին, որ չպետք է մտնենք այգի: Մենք էլ որոշեցինք քննարկումն անցկացնել փողոցում»:
Ավելի վաղ Operativ լրատվականը հայտնել էր, որ Քննչական կոմիտեն հրապարակել էր Ամուլսարի ոսկեբեր քվարցիտների հանքավայրի շահագործման հետ կապված համալիր փորձաքննության արդյունքները, որի կատարումը հանձնարարվել էր Advanced Resources Development (ELARD) ընկերության փորձագետների խմբին:
Ըստ այդ փորձաքննության արդյունքների՝ եզրակացության ընթացքում 16 կետ է նշվել, որոնք պահպանելու դեպքում բնապահպանական ռիսկերը կդառնան կառավարելի:
Բաղրամյան 26-ում վարչապետ Նիկոլ Փաշինյանը ջերմուկցիներին հրավիրել էր հանդիպման: Միաժամանակ Բաղրամյան-26-ի դիմաց բողոքի ակցիա է ընթանում ընդդեմ Ամուլսարի հանքի շահագործման: