«Նախկինում ամուսնական զույգերի մոտ անպտղության դեպքում ընտանիքի անդամները մեղադրում էին կնոջը. Այժմ հասկացել են, որ ոչ միշտ է կինը մեղավոր». Օկոև
Հայաստանում անպտղության ցուցանիշները կազմում են մոտ 14-15%: Այս մասին NEWS.am Medicine-ի հետ զրույցում ասել է Մոր և մանկան առողջության պահպանման գիտահետազոտական կենտրոնի տնօրեն, պրոֆեսոր Գեորգի Օկոևը:
Նրա խոսքով՝ տվյալ ցուցանիշները փոքր-ինչ նվազել են, ինչին նպաստում է Հայաստանում բժշկական նոր տեխնոլոգիաների, այդ թվում՝ օժանդակող ռեպրոդուկտիվ տեխնոլոգիաների ներդրումը: Եվս մեկ գործոն է վաղ բուժօգնության դիմելը:
«Եթե չեմ սխալվում, 2014 թվականին ամուսնական զույգերի մոտ անպտղության ցուցանիշները կազմել են 16.5%»,- ասել է Օկոևը:
Տարածվածության առումով առաջին տեղում է կանացի շրջանում անպտղությունը (օրինակ, փոքր կոնքի օրգանների կպման կամ հորմոնալ խանգարումների հետևանքով):
«Ելնելով մեր կլինիկա դիմումներից՝ տղամարդկանց շրջանում անպտղությունը կազմում է դեպքերի 30-35%-ը: Բացի այդ, դեպքերի մոտ 10-12%-ը անհայտ գենեզի անպտղությունն է»,- նշել է պրոֆեսորը:
Փորձագետն ուշադրություն է դարձրել նրան, որ սերմնահեղուկի ձևավորման խախտման գործում որոշակի դեր են խաղում էկոլոգիական գործոններն ու վնասակար սովորությունները (այդ թվում ծխելը):
«Նախկինում ամուսնական զույգերի մոտ անպտղության դեպքում ընտանիքի անդամները մեղադրում էին կնոջը: Այժմ, երբ սկսել են ուշադրություն դարձնել տղամարդկանց անպտղությանը, հասկացել են, որ ոչ միշտ է կինը մեղավոր»,- նկատել է Օկոևը: